Amnesty International միջազգային իրավապաշտպան կազմակերպությունը Գերմանիայի կառավարությանը կոչ է արել Թուրքիայի նախագահ Ռեջեփ Թայիփ Էրդողանի հետ բանակցություններում բարձրացնել նրա երկրում մարդու իրավունքների թեման:
Էրդողանի պաշտոնական այցը Բեռլին պետք է առիթ հանդիսանա «բոլոր անմեղ մարդկանց պաշտպանելու համար, որոնք կանխամտածված կալանավորվել էին» Թուրքիայում: Այս մասին հայտարարել է Բեռլինում AI-ի գերմանական մասնաճյուղի գլխավոր քարտուղար Մարկուս Բեկոն, հաղորդում է DW-ն:
Եթե թուրքական կառավարությունը համաշխարհային հանրության հետ հարաբերությունների թարմացում է ցանկանում, ապա առաջին հերթին այն պետք է կատարի իր միջազգային պարտավորությունները, նշել է Բեկոն: Նա մասնավորապես, Անկարային կոչ է արել, դադարեցնել «արդարադատության գործիքավորումը» եւ հետեւել Մարդու իրավունքների եվրոպական կոնվենցիային:
Բեկոյի խոսքով ներկայումս ավելի քան 150 լրագրողներ բանտարկված են թուրքական բանտերում, ավելի շատ, քան աշխարհի ցանկացած այլ երկրում: Բացի այդ, վերջին երկու տարիներին, ըստ AI-ի, Թուրքիայում փակվել են հարյուրավոր հասարակական կազմակերպություններ եւ մեդիա ընկերություններ:
Էրդողանը սեպտեմբերի 27-ից 29-ը պետական այցով կլինի Գերմանիայում: Սա կլինի նրա առաջին այցը Գերմանիա 2014 թվականին նախագահ ընտրվելուց հետո:
Սեպտեմբերի 22-ին Թուրքիայի նախագահի քաղաքականության հարյուրավոր հակառակորդներ բողոքի ակցիաներ են անցկացրել Գերմանիայի քաղաքների փողոցներում: Սեպտեմբերի 27-ի առավոտյան Բեռլինի «Տեգել» օդանավակայանում, որտեղ պետք է վայրէջք կատարի Էրդողանի ինքնաթիռը, «Լրագրողներ առանց սահմանների» իրավապաշտպան կազմակերպության նախաձեռնությամբ բողոքի ակցիա էր տեղի ունեցել: