Նիդերլանդներում հայազգի կինն իր ընտանիքի 4 անդամների հետ տեղափոխվել է Կաթվեյքում գտնվող եկեղեցիներից մեկը` Հայաստան չարտաքսվելու նպատակով: Այս մասին գրում է Dutch News կայքը:
Ընտանիքն ապրում է Կաթվեյքի փախստականների կենտրոններից մեկում:
Հայարփի անունով աղջիկը Թիլբուրխի համալսարանում էկոնոմետրիկա է ուսումնասիրում: Նրա քույրը, եղբայրը եւ ծնողները 9 տարի է, ինչ Նիդերլանդներում են, սակայն նրանց սպառնում են հետ ուղարկել Հայաստան:
Twitter-ում Հայարփին հայտնել մ է, որ իր ընտանիքը դատական երեք նիստի արդյունքում փախստականի կարգավիճակ է ստացել, սակայն Հոլանդիայի կառավարությունն ամեն անգամ բողոքարկել է այդ որոշումը: Ի վերջո` նրանք երեք տարի առաջ մերժում են ստացել: Ընտանիքը հույս ունի, որ արդարադատության նախարար Մարկ Հերբերսը կօգտագործի իրեն օրենքով տրված արտոնությունը եւ ընտանիքին մնալու թույլտվություն կշնորհի, ինչպես որ արել է հայազգի երեխաների` Լիլիի եւ Հովիկի դեպքում:
Նշվում է, որ այս գործը հատկապես ամոթալի է կոալիցիոն կառավարության համար, քանի որ Հայարփին ChristenUnie-ի ակտիվ անդամներից է: Այս կուսակցությունը նախընտրական քարոզարշավի ժամանակ կոչ էր անում փոփոխել երեխաների համաներման կարգը ` մինչեւ կոալիցիոն կառավարության մաս կազմելը:
Կուսակցությունը մեծ լոբբիստական գործունեություն է վարել, որպեսզի Հերբերսին համոզեն թույլ տալ Լիլիին ու Հովիկին` մնալ Նիդերլանդներում: