Ավագ եւ միջնեկ քույրերը Քրիստինան եւ Անգելինան, մեկուսարանից դուրս գալուց հետո նախընտրում են տանը մնալ եւ դուրս չգալ։ Այս մասին պատմել են աղջիկների փաստաբաններ Ալեքսեյ Պարշինը եւ Ալեքսեյ Լիպցերը՝ տեղեկացնում է «360»հեռուստաալիքը։
Ըստ նրանց՝ որեւէ ծրագիր քույրերը դեռեւս չեն կազմում, ուղղակի հանգստանում են եւ չեն օգտագործում զբոսնելու թույլտվությունը։
Կրտսեր քրոջ՝ Մարիայի փաստաբան Յարոսլավ Պակուլինը պատմել է, որ աղջիկը համակերպվում է եւ մոր հետ արդեն դուրս է եկել զբոսնելու։ Նա նշել է, որ այժմ որոշվում է մոր տան կողքի դպրոց նրան տեղափոխելու հարցը։
Փաստաբանների կարծիքով՝ հետաքննությունը մի քանի ամիս կտեւի։
Անցյալ հինգշաբթի Մոսկվայի Բասմանյան դատարանը վճռել էր մեկուսարանից ազատ արձակել Խաչատրյան քույրերին, սակայն սահմանել էր մի քանի արգելքներ, այդ թվում նրանց հաղորդակցվելը։ Նրանց թույլատրված է զբոսնել 07։00-ից մինչեւ 21։00-ն, բայց արգելված է օգտվել ինտերնետից եւ հեռախոսային կապից։ Զանգել նրանք կարող են փաստաբաններին, քննիչներին եւ արտակարգ իրավիճակներում հատուկ ծառայություններին։ Դատարանի որոշումն ուժի մեջ է մինչեւ դեկտեմբերի 28-ը։