Մեծ Բրիտանիայի վարչապետ Թերեզա Մեյը հայտարարել է, որ Եվրամիությունը տարբերվում է ԽՍՀՄ-ից։ Այսպիսով նա արձագանքել է իր երկրի ԱԳ նախարար Ջերեմի Հանթին, ով իր վերջին ելույթում համեմատել էր երկու միությունները՝ տեղեկացնում է Reuters-ը։
Հանթը, կիրակի օրը Բիրմինհեմում մասնակցելով Պահպանողական կուսակցության համագումարին, իր ելույթում ասել էր, թե ԵՄ-ն վերածվում է ԽՍՀՄ-ի։ Նրա խոսքերով՝ եթե ԵՄ-ն սկսի խոչընդոտել իր կազմից անդամ-երկրների դուրս գալուն, ապա նրան լքելու ցանկությունը միայն կմեծանա։
Պատասխանելով այն հարցին, թե ճիշտ է արդյոք Հանթը, Մեյն ասել է․ «Ես ԵՄ-ում կլոր սեղանի շուրջ նստում եմ այն երկրների ներկայացուցիչների հետ, որոնք մի ժամանակ Խորհրդային Միության մաս են կազմել, իսկ այժմ ժողովրդավարական պետություններ են։ Եւ ես կարող եմ ձեզ ասել, որ այդ երկու կազմակերպությունները բոլորովին նույնը չեն»։
Հանթի խոսքերը տարակուսանք են առաջացրել հատկապես դաշինքի մի քանի անդամների շրջանում՝ Արեւելյան Եվրոպայից, որոնք լիակատար անկախություն ստացան միայն 1991թ․ ԽՍՀՄ-ի փլուզումից հետո։