Հայաստանի վարչապետ Նիկոլ Փաշինյանն ինքն էլ պատկերացում չունի իր վերջնական նպատակների մասին, ոչ մի քաղաքական ծրագիր չունի: Հոկտեմբերի 4-ին լրագրողների հետ հանդիպման ժամանակ այս մասին ասաց «Ազգային ինքնորոշում» միավորման ղեկավար Պարույր Հայրիկյանը:
Նա զուգահեռներ անցկացրեց ՀՀ առաջին նախագահ Լեւոն Տեր-Պետրոսյանի եւ գործող վարչապետ Նիկոլ Փաշինյանի միջեւ: Հայրիկյանի խոսքով՝ երբ շարժումը սկսվեց, Փաշինյանը որոշակի հայտարարություններ էր անում արտահերթ խորհրդարանական ընտրությունների եւ դրանց անցկացման անմիջական ժամկետների մասին, սակայն հիմա այլ առանցքով է հանդես գալիս՝ նախատեսելով ընտրությունները տեղափոխել դեկտեմբեր: Սա շատ է հիշեցնում Տեր-Պետրոսյանի վարքագծի ոճը: Մինչդեռ երկրում բոլոր քաղաքական գործընթացները պետք է ընթանան Սահմանադրությանը խիստ համապատասխանությամբ:
Քաղաքական գործիչը նաեւ խստորեն քննադատեց խորհրդարանի շենքի դիմացի պուրակը գրոհելու Փաշինյանի եւ նրա կողմնակիցների գործողությունները: «Ի վերջո, դա Ազգային ժողովն է, եւ նրանք կարող են տարբեր որոշումներ ու օրենքներ ընդունել, որոնց հետ ոչ միշտ է հնարավոր համաձայնել, սակայն չէր կարելի այդպես վարվել»,- արձանագրեց Հայրիկյանը: Խորհրդային տարիների նախկին այլախոհը, միաժամանակ, նշեց, որ ակնհայտ է նաեւ այն, որ խորհրդարանը չի ցանկանում գնալ ինքնալուծարման, եւ այդ օրը նրանց ընդունած օրենքն ուղղված էր հատկապես իրենց անվտանգության ապահովմանը պատգամավորների համար իրադարձությունների ոչ ցանկալի զարգացման դեպքում:
Նա, միաժամանակ, հիշեցրեց, որ բողոքի շարժման կողմնակիցն է եղել եւ Փաշինյանին ու նրա կողմնակիցներին աջակցել է: Ինքն էլ հիմա հանդես է գալիս խորհրդարանը ցրելու օգտին: «Սակայն պետք է ասեմ, որ Փաշինյանի վերջին հայտարարությունները դիկտատորի հայտարարություններ են, որոնք ոչ մի իրավաբանական կամ բարոյական հիմք չունեն»,- հավելեց Հայրիկյանը:
Քաղաքական գործիչը հիշեցրեց, որ վարչապետ Նիկոլ Փաշինյանը բազմաթիվ բարեփոխումներ եւ փոփոխություններ էր խոստացել, այդ թվում՝ կապված նաեւ Սահմանադրության հետ: Նա շատ բան է խոստացել նաեւ Սփյուռքին: «Եվ եթե չկատարի խոստումները, ապա կստացվի, որ նրանց եւ մեզ բոլորիս խաբել է»,- շեշետեց Պարույր Հայրիկյանը:
Նրա խոսքով՝ Հայաստանի վարչապետը նախ պայքարում էր այդ ժամանակվա նախագահ Սերժ Սարգսյանի դեմ՝ վերջինին դիկտատոր անվանելով, սակայն դրա հետ մեկտեղ, այսօրվա դրությամբ՝ նա, փաստորեն, շարունակում է Սերժ Սարգսյանի քաղաքականությունը եւ Սահմանադրությունը հարմարեցնում է իր շահերին: «Ընդհանրապես, դիկտատորներին հատուկ է իրենց համար հակառակորդներ ստեղծելը, որոնց դեմ պետք է մշտապես պայքարել: Եվ այս կերպ Փաշինյանը գնում է Հայաստանում քաղաքական ճգնաժամի սրման ու խորացման»,- եզրափակեց քաղաքական գործիչը:
Հիշեցնենք, որ հոկտեմբերի 2-ին խորհրդարանի կողմից Ազգային ժողովի արձակումը դժվարացնող օրենքի ընդունումից հետո վարչապետ Նիկոլ Փաշինյանը իր կողմնակիցներին ուղղորդեց դեպի խորհրդարանի շենք: Նա նաեւ նախաձեռնեց ԲՀԿ եւ ՀՅԴ նախարաների ու մարզպետների պաշտոնանկությունը:
