Եթե աշխատավարձի կամ նպաստի չհիմնավորված բարձրացում տեղի ունենա, ապա դա աղքատությունն ավելի կխորացնի եւ իր հետ կտանի նաեւ նրանց, որոնք աշխատում ու արդյունք են ստեղծում: Այս մասին այսօր՝ հոկտեմբերի 4-ին, լրագրողների հետ հանդիպման ժամանակ նշել է ՀՀ ֆինանսների նախարար Ատոմ Ջանջուղազյանը՝ ներկայացնելով 2019 թվականի պետական բյուջեի նախագիծը:
«Այսինքն եթե մեր հնարավորություններով չենք կարողանում բարձրացնել աշխատավարձն ու նպաստը, ապա նշանակում է, միակ ճանապարհը մնում է պարտք վերցնելով բարձրացնելը: Իսկ նման բանի համար պարտք վերցնելը ոչ մի տեսակետից արդարացում չի կարող ունենալ:
Արդյոք մեր նպատակն է, որ առողջ, աշխատունակ մարդը նպաստ ստանա, արդյոք մեր նպատակադրումը չպե՞տք է լինի, որ առողջ, աշխատունակ մարդը մոտիվացիա ունենա աշխատելու, ոչ թե հակախթան ունենա, իր ունեցած-չունեցածից ազատվի, որ նպաստառուների ցուցակում իր տեղը պահպանի»,-հայտարարեց Ջանջուղազյանը:
Հարցին, թե արդյոք Հայաստանը շարունակելու է պարտք վերցնել, նա պատասխանեց. «Այո, պարտք ենք վերցնելու, բայց խնդիրն այն է, թե արդյոք դա լավացնելու է մեր վիճակը, թե վատացնելու: Երբ ասում ենք, որ պարտք ենք վերցնում, որը մեր հարաբերական ցուցանիշը լավացնում է, այդ դեպքում պետք է համաձայնենք, որ դա լավացնում է վիճակը:
Պատկերացրեք, որ ձեր աշխատավարձի 30 տոկոսի չափով վարկ եք վերցրել, ձեր աշխատավարձը բարձրացավ 30 տոկոսով, հետեւաբար ձեր պարտքի կշիռը ձեր եկամուտների մեջ նվազեց: Դուք արդեն կարող եք ավելի շատ վարկ վերցնել: Հիմա կվերցնե՞ք նոր պարքտ, թե ոչ: Այդ որոշումը կախված է նրանից, թե ինչի վրա եք ծախսելու այդ վարկը: Հիմա եթե պետությունը պարտքը վերցնում է նոր ակտիվ ստեղծելու համար, որը նոր եկամուտներ է բերելու, հավանական է, որ կվերցնեք»: