Օգոստոսի պաշտոնական տվյալներով՝ Հայաստանում վաճառվել է 1619 բնակարան, ինչը 264 միավորով (կամ 19,5 տոկոսով) գերազանցում է անցյալ տարվա նույն ամսվա մակարդակը: Այս թվից բնակարանների առուվաճառքի 1090 գործարք (կամ 67 տոկոսից ավելին) բաժին է ընկել երկրի մայրաքաղաքին: Ընդհանուր ցուցանիշում մարզերի բաժինը տատանվում է 0,4 տոկոսից (Վայոց ձոր) մինչեւ 8,7 տոկոս (Կոտայք) սահմաններում:
Հաշվետու ամսում մայրաքաղաքում վաճառվել է 194 բնակարանով (կամ գրեթե 22 տոկոսով) ավելի, քան մեկ տարի առաջ: Հանրապետության քաղաքների շարքում Երեւանն աճի տոկոսներով ամենեւին առաջատարը չէ: Օրինակ՝ Արագածոտնում օգոստոսին բնակարանների առուվաճառքի գործարքների քանակությունը տարեկան կտրվածքով աճել է գրեթե 1,9 անգամ: Սակայն եթե դիտարկենք թվային ցուցանիշներով, ապա այնտեղ պատկերը շատ ավելի համեստ է. անցյալ տարվա օգոստոսին վաճառվել է 9 բնակարան, ընթացիկ տարվա հաշվետու ամսում՝ 17:
Մայրաքաղաքում է կենտրոնացված հանրապետական բնակֆոնդի կեսից ավելին: Դե, իսկ ըստ բնակարանային շուկայի դինամիկության՝ Երեւանը մարզերին գերազանցում է: Բնակարանների գնորդների թվաքանակով մայրաքաղաքը առաջ է անցնում բոլոր մարզերին միասին վերցրած: «Միլիոնանոց» Երեւանը շատ ավելի մեծ հնարավորություններ է ընձեռում հենց մեգապոլիսի մեջ բնակության վայրի փոփոխության համար, քան ոչ մեծ քաղաքներում: Դրանից բացի, մայրաքաղաքում բնակարանները գրավիչ են ինչպես մարզերի բնակիչների, այնպես էլ արտասահմանցիների համար: Վաճառքի դինամիկայի վրա անդրադառնում է նաեւ այնպիսի գործոնը, ինչպիսին է հիփոթեքի դեպքում պետական աջակցությունը Երեւանի նորակառույցներում բնակարաններ ձեռք բերելիս:
Ստորեւ ներկայացված աղյուսակում ըստ մայրաքաղաքի վարչական շրջանների բերված են բնակարանի 1 քառ.մ մակերեսի միջին շուկայական գները: Գների դրամից ԱՄՆ դոլարի փոխանցումը կատարվել է Հայաստանում արժույթների փոխարժեքի հիման վրա՝ աղյուսակում նշված ամսվա համար:
Նշենք, որ պաշտոնական վարկածով գներն անշեղորեն աճում են: Մայրաքաղաքի բոլոր վարչական շրջաններում բնակարանները թանկացել են: Օգոստոսին ամենամեծ տարեկան աճը գրանցվել է Կենտրոն վարչական շրջանում (19,7 տոկոսով), ամենափոքրը՝ Նուբարաշենում (0,8 տոկոսով): Շատերը սա կապում են երկրի կյանքում դրական փոփոխությունների սպասումների հետ, որոնք կարող են փոխել մեր քաղաքացիների միգրացիայի վեկտորը:
