Ստամբուլի ոստիկանությունը հատուկ գործողության ժամանակ ձերբակալել է Ադրբեջանի գլխավոր «օրենքով գող» Նադիր Սալիֆովին, որը քրեական շրջանակներում հայտնի է «Լոտա Գուլի» մականունով, հայտնում է Sozcu պարբերականը:
Թուրքիայում Սալիֆովի մասին սկսել են խոսել Ադրբեջանից քրեական հեղինակություն Ռովշան Ջանիեւի (Ռովշան Լենքորանսկի) սպանությունից հետո:
Սալիֆովը Ստամբուլի Կազմակերպված հանցավորության դեմ պայքարի վարչության տեսադաշտում է հայտնվել, երբ ռուսական լրատվամիջոցներում տեղեկություններ են տարածվել, որ Թուրքիայում գտնվելով՝ նա Ռուսաստանի Կալուգայի մարզում ձեռնարկատերերից հարկ է հավաքում։
Հոկտեմբերի 8-ին հաղորդվել էր, որ Սալիֆովը տեսակոնֆերանսի միջոցով հարկ է սահմանել ադրբեջանցի խոշոր ձեռնարկատերերի վրա:
Օգոստոսի 23-ին Սալիֆովին ձերբակալել էին Մոնտենեգրոյի մայրաքաղաք Պոդգորիցայում, սակայն հետո բաց էին թողել:
Ներկայումս Նադիր Սալիֆովը Մերաբ Ջանգվելաձեի (Սուխումսկի) եւ Լաշա Շուշանաշվիլիի (Ռուստավսկի) հետ միասին համարվում է ամենաազդեցիկ «օրենքով գողերից» եւ Ռուսաստանի քրեական աշխարհում առաջնորդի հավանական հավակնորդներից մեկը: Նախկին առաջնորդ Զաքարիա Քալաշովը (Շաքրո Մոլոդոյ) վերջերս գրեթե 10 տարվա բանտարկության է դատապարտվել դրամաշորթության մեղադրանքով։
