ԱՄՆ նախագահի ազգային անվտանգության հարցերով խորհրդական Ջոն Բոլթոնի այցը շատ էական է։ Այս մասին այսօր՝ հոկտեմբերի 18–ին, Կառավարության նիստից հետո լրագրողների հետ զրույցում ասաց ՀՀ արտաքին գործերի նախարարի պաշտոնակատար Զոհրաբ Մնացականյանը։
«Այցին ավելի մոտ շրջանում այդ մասին կխոսենք, հիմա մենք պատրաստվում ենք, շատ էական է այցը։ Բոլթոնը գալիս է Ռուսաստան, գալիս է տարածաշրջան, եւ մենք ունենք մեր օրակարգը ԱՄՆ–ի հետ, հաստատված օրակարգ է, տարիներով ձեւավորված։ Կան երկկողմ հարցեր, կա տարածաշրջանային օրակարգ, որի շուրջ ԱՄՆ–ի հետ անցկացնելու ենք հանդիպումներ»,– ասաց Զոհրաբ Մնացականյանը։
Հարցին՝ հնարավոր է այցի նպատակն է ավելի զարգացնել Հայաստան–ՆԱՏՕ հարաբերությունները, նախարարի պաշտոնակատարը պատասխանեց. «Մենք ունենք մեր ձեւավորված դիրքորոշումներն ու մնում ենք այդ դիրքորոշումների շրջանակում»։