Ստամբուլում Սաուդյան Արաբիայի հյուպատոսության կցորդ Ահմեդ Աբդուլլա Ալմուզաինին, ով այդ երկրի հետախուզության ռեզիդենտն է Թուրքիայում, լրագրող Ջամալ Խաշոգջիի սպանության հրամանը ստացել է ընդհանուր հետախուզական ծառայության ղեկավարի տեղակալից եւ արքայազնի խորհրդական Ահմեդ Ասիրիից՝ տեղեկացնում է Sabah-ը։

Նշվում է, որ Ալմուզաինին սեպտեմբերի 28-ին, երբ Խաշոգջին առաջին անգամ եկել է հյուպատոսություն՝ ամուսնության համար անհրաժեշտ փաստաթղթերը կարգավորելու նպատակով, գտնվել է հյուպատոսության շենքում։ Հաջորդ օրը Ալմուզաինին մեկնել է Էր Ռիադ, որտեղ հանդիպել է Ասիրիի հետ եւ հրահանգներ է ստացել՝ կապվախ 15 մարդուց բաղկացած խմբի հետ, որը ավելի ուշ ժամանել է Ստամբուլ՝ լրագրողին սպանելու համար՝ ասվում է հաղորդագրության մեջ։

Հոկտեմբերի 1-ին սաուդյան հյուպատոսության կցորդը վերադարձել է Ստամբուլ եւ հրամանը փոխանցել է գլխավոր հյուպատոս Մուհամմեդ Ալ Ուտեյբիին։ Հոկտեմբերի 2-ի գիշերը, երբ Խաշոգջին արդեն սպանված էր, Ալմուզաինին կրկին վերադարձել է հայրենիք։ Հետաքննության վարկածով՝ հենց նա է եղել Ստամբուլի եւ Էր Ռիադի միջեւ «արյունոտ թրաֆիքի գաղափարախոսը»՝ տեղեկացնում է ՌԻԱ Նովոստին։