Հայ–ռուսական հարաբերություններում երբեք վստահության այսպիսի բարձր մակարդակ չի եղել, ինչպիսին մենք ունենք այսօր։ Այս մասին խորհրդարանում հայտարարեց վարչապետի թեկնածու, վարչապետի պաշտոնակատար Նիկոլ Փաշինյանը։
«Հետո մեզ մեղադրեցին Ռուսաստանին ծախվելու մեջ, թե այ հիմա Եվրամիության հետ հարաբերությունը փչացրին։ Թույլ տվեք էլի ասեմ՝ եվրոպական մեր գործընկերների հետ երբեք փոխվստահության այսպիսի մակարդակ չի եղել։ Վաղը սպասվում է ԱՄՆ բարձրաստիճան պատվիրակության այցը, եւ վստահ եմ, որ նույն արդյունքի կհասնենք նաեւ այդտեղ։ Գաղտնիքը հետեւյալն է՝ Կառավարությունը ներկայացնում է իր ժողովրդին, թե ոչ»,– ասաց Նիկոլ Փաշինյանը։
Վարչապետի թեկնածուն նշեց, որ սա չի նշանակում, թե արտաքին քաղաքականության օրակարգում բոլոր հարցերը լուծված են. «Լուծված է մեկ հարց՝ մեզ ընկալում են որպես գործընկեր, եւ մենք մեր գործընկերների հետ հարաբերություններում անկեղծ ենք, բաց ենք, կան, իհարկե, թնջուկներ, որոնք մենք պետք է քննարկենք, փորձենք լուծել»։
