Վարչապետի պաշտոնակատար, վարչապետի թեկնածու Նիկոլ Փաշինյանը մտադիր է Ամուլսարի հարցը լուծել իրավական ընթացակարգերով։
Այսօր՝ հոկտեմբերի 24–ին, խորհրդարանում Փաշինյանը հայտարարեց, որ պետք է խնդիրն այնպիսի իրավական ընթացակարգերով տանել, որ լինեն պատասխաններ, որոնք անառարկելի լինեն մասնագիտական հարթության վրա։
«Կարծում եմ՝ քրեական գործի ընթացակարգով պետք է հրավիրել այնպիսի հեղինակավոր միջազգային կազմակերպության, որ գա եւ տա եզրակացություն խնդրի վերաբերյալ, եւ այդ եզրակացությունը պետք է պատասխանի բոլոր առաջադրված հարցերին։ Չի կարելի կույր գնալ որոշման, ես հարգում եմ մեր բոլոր միջազգային գործընկերներին, սակայն, չի կարող ոչ մի միջազգային ներդրողի շահն ավելի բարձր լինի, քան մեր ժողովրդինը, պետությանը»,– ասաց Նիկոլ Փաշինյանը։
Վարչապետի թեկնածուն նշեց, որ ներկայումս բնապահպանական ոլորտում փաստեր թաքցնելու փաստով կա հարուցված քրեական գործ։