Հայաստանում հեղափոխությունը ապագայի հանդեպ հույս է ներշնչել ժողովրդին, սակայն նշանակալի արդյունքների հասնելու համար միայն հույսը բավարար չէ։ Այսպիսի կարծիք NEWS.am-ի թղթակցի հետ զրույցում հայտնեց հայկական ծագումով ամերիկյան բիզնեսմեն եւ բարերար, Հայաստանի գիտատեխնիկական հիմնադրամի (FAST) համահիմնադիր Նուբար Աֆեյանը։
Նրա խոսքերով՝ դրա համար կոնկրետ աշխատանք է պետք, կոնկրետ ներդրումներ եւ պետական աջակցություն։
«FAST-ի օրինակով կարող եմ նշել, որ պետությունը եւ մասնավոր ոլորտը ակտիվորեն համագործակցում են կոնկրետ նախագծերի առաջընթացի համար, եւ մենք կշարունակենք մեր ներդրումային գործունեությունը Հայաստանում։ Որպես խոշոր ներդրող, մենք միշտ վստահ ենք մեզ զգացել այստեղ, քանի որ ծառայել ենք երկրի երիտասարդ սերնդին»,- նշեց Աֆեյանը։
Նրա խոսքերով՝ տվյալ պահին ներդրողները հետաքրքրված են Հայաստանով, սակայն որպեսզի այդ հետաքրքրությունը կոնկրետ նախագծերի վերածվի, ժամանակ է հարկավոր։
«Մենք տեսնում ենք, որ Հայաստանում բարելավվել է ներդրումային մթնոլորտը, ինչը պայմանավորված է օրենքի գերակայության հաստատումով, սակայն ներդրումային վստահության բարձրացման համար տարիների համբերություն է հարկավոր, ինչը ավելի կարեւոր է, քան Հայաստանում հեղափոխական փոփոխությունները»,- ասաց բիզնեսմենը։
