Ավստրալիան կարող է դառնալ այն վայրը, որտեղ ահաբեկիչների համար հատուկ պայմաններով բանտ կկառուցվի։ Այսպիսի առաջարկությամբ Ալիս-Սփրինգսից բիզնես-խումբը դիմել է Հյուսիսային Տարածք նահանգին՝ տեղեկացնում է ABC-ն։
Առաջարկությունը ստացվել է նահանգի վարչապետի եւ երկրի ՆԳ նախարար Փիթեր Դաթոնի աշխատակազմերում։ Բիզնեսմենների նամակում, մասնավորապես, ասվում է, որ «ուղղիչ հաստատությունը ոչ միայն կծառայի նահանգի զարգացմանը, այլեւ կլուծի ազգային քրեակատարողական համակարգի խնդիրների մի մասը»։
Բիզնես-խումբը, որը գլխավորում է Ալիս-Սփրինգսի օդանավակայանի մենեջեր Դեւիդ Բաթիկը, համարում է, որ բանտի շինարարությունը 450-600 մլն դոլար կարժենա, եւ կարող է իրականացվել մասնավորի եւ պետության համագործակցության կամ դաշնային կառավարության վարկավորման հաշվին։
Հյուսիսային Տարածքի վարչապետ Մայքլ Հանների խոսքերով՝ թեեւ ահաբեկիչների համար բանտի կառուցումը նահանգի ծրագրերում չկար, նախաձեռնությունն ընդունելի է իր համար։ «Սա կառավարական ծրագիր չէ, այլ՝ մասնավոր։ Շինարարությունը կկատարվի մասնավոր հողում՝ մասնավոր սեկտորի միջոցների հաշվին։ Մեր կառավարությունը հակված չէ խանգարել նահանգի տարածքում մասնավոր բիզնեսի զարգացմանը»,- նշել է Հանները։