Իրանի Սահմանադրության պահապանների խորհուրդը, որը վերխորհրդարանական մարմին է եւ կազմված է հոգեւորականության ներկայացուցիչներից, մերժել է Ահաբեկչության ֆինանսավորման դեմ պայքարի մասին միջազգային կոնվենցիային երկրի միանալու մասին օրինագիծը, փոխանցում է ՏԱՍՍ-ը՝ վկայակոչելով Խորհրդի մամուլի քարտուղար Աբաս Ալի Ղադհոդաիի թվիթերյան գրառումը:
«Սահմանադրության պահապանների խորհուրդը իր բազմաթիվ նիստերում քննարկել է Ահաբեկչության ֆինանսավորման դեմ պայքարի մասին միջազգային կոնվենցիային երկրի միանալու մասին օրինագիծը եւ ձեւակերպումներում անհամաձայնեցվածություն ու երկիմաստություն հայտնաբերել: Դրանք պարունակում են շարիաթին (իսլամական իրավունքին) հակասություններ եւ հակասում են (Իրանի) Սահմանադրությանը, որոնք հայտնաբերելուց հետո ուղարկվել են Մեջլիս (Իրանի միապալատ խորհրդարան) վերջնամշակելու»,- նշված է հաղորդագրության մեջ:
Հոկտեմբերի 7-ին IRNA գործակալությունը տեղեկացրել էր, որ Մեջլիսի պատգամավորները այս օրինագծի ընդունմանը կողմ էին քվեարկել, որը 4 նորմատիվային ակտերից մեկն է, որոնք մշակվել են Փողերի լվացման դեմ պայքարի ֆինանսական միջոցների մշակման միջկառավարական խմբի (ՖԱԹՖ) հաստատած հրահանգների շրջանակում: Դրանց թվում էին փողերի լվացման դեմ պայքարին ուղղված դրույթների բարեփոխումը, ահաբեկչության ֆինանսավորման մասին օրենքի փոփոխությունը, ՄԱԿ Հակահաբեկչական կոնվենցիային եւ Անդրազգային կազմակերպված հանցավորության դեմ կոնվենցիային Իրանի միանալը: