ԵՏՄ տարածքում 2019 թվականի հունվարի 1-ից ֆիզիկական անձանց համար նոր, ավելի խիստ կանոններ կգործեն՝ կապված երրորդ երկրներից առանց մաքսատուրքի ապրանքներ ներմուծելու ծավալների հետ։ Մասնավորապես, եթե գործող կանոններով երրորդ երկրներից առանց տուրքերի ներմուծման առավելագույն շեմը 1500 եվրո արժեքով ու 50 կգ քաշով ուղեբեռն է, ապա Ամանորից հետո եթե ուղեբեռը շատ լինի 25 կգ-ից եւ 500 եվրոյից, ապա պետք է քաղաքացին 30 տոկոս մաքսատուրք վճարի։
Այս առնչությամբ, ԱԺ նախկին պատգամավոր, տնտեսագետ Վարդան Բոստանջյանը NEWS.am-ի հետ զրույցում նշեց, որ նման ծավալային, քաշային սահմանափակումները բնականաբար Հայաստանի համար շատ ցանկալի բան չէ, բայց բոլոր պարագաներում ներքին արտադրությունը մեծացնելու, առեւտուրը երկրորդ պլան մղելու եւ արտադրական պրոցեսը խթանելու կտրվածքով ակնհայտորեն այդ սահմանափակումները պետք են։
«Ըստ էության, երկրի վարչապետն ասաց, որ մեծ թվով չաշխատողների պարագայում երկիրը գտնվում է ավելի շատ սպառման դաշտում։ Այդ պարագայում, ըստ էության, նյութական բարիքների արտադրությամբ հիմնականում չափազանց քիչ զբաղվողներ կան, որի դեպքում երկիրը չի կարող տնտեսական կոլապսից դուրս գալ։ Ես չեմ կարող պնդել, թե որքանով այս իրավիճակի կանոնակարգումը կբերի դրան, բայց ըստ էության սա կանոնակարգման պրոցես է, որն անհրաժեշտ է, որ տեղի ունենա»։
Վարդան Բոստանջյանը ցավով նկատեց, որ ամբողջ հետխորհրդային տարածքում եւ մասնավորապես ԵՏՄ երկրներում ծառայությունների ոլորտում մոլային ռեժիմ է, առեւտուրն է առաջին պլան մղվում, որի պարագայում արտադրական ոլորտը հետ է մղվում. «Մենք խոսում ենք տեխնոլոգիական զարգացման մասին եւ այս կարգավորումը նման նպատակ է հետապնդում»։
Դիտարկմանը, թե այսինքն եթե անհատ քաղաքացիների համար ներմուծման սահմանափակումները խստացնեն, դրանից արտադրությունը կզարգանա՞, Բոստանջյանն արձագանքեց. «Ցանկացած երկրի համար, այդ թվում կենտրոնացված պլանավորման տարիներին, փակության եւ բացության աստիճան կա, եւ որքան էլ մենք գտնվում ենք շուկայական հարաբերությունների պայմաններում, երկրները հաճախ դառնում են պարզապես սպառողներ, իրենց մոտ չեն խթանում ամենատարբեր արտադրություններ։
Նման սահմանափակումների պարագայում սուբյեկտը՝ ֆիզիկական, թե իրավաբանական, արդեն մտածում է սեփական արտադրությունն ունենալու մասին։ Ես իհարկե, չեմ ուզում հավակնել կամ պնդել, որ նման մոտեցումը պետք է ուղղակիորեն խթանի այս գործընթացը, բայց դա նաեւ այդպիսի նպատակ է հետապնդում»։
Նշենք, որ այս կարգավորումները ԵՏՄ տարածքում նախատեսված էր, որ պետք է ուժի մեջ մտնեն 2021 թվականին, բայց հիմա որոշվել է արագացնել գործընթացները։
