Այսօր Հայաստանում կառավարման համակարգը դանդաղաշարժ է եւ օպտիմալացման տեղ կա: Այս մասին, այսօր՝ նոյեմբերի 13-ին, ԱԺ-ում 2019 թվականի բյուջեի նախագծի քննարկման ժամանակ նշեց ֆինանսների նախարարի պաշտոնակատար Ատոմ Ջանջուղազյանը՝ հավելելով, որ մենք կարող ենք ունենալ ավելի մոբիլ, արագագործ կառավարման համակարգ:
«Մենք գործ ունենք մի իրավիճակի հետ, երբ կառավարման համակարգին զուգահեռ ձեւավորվել են անորոշ մանդատներով տարբեր կառույցներ՝ ՊՈԱԿ-ներ, հիմնադրամներ, ԾԻԳ-եր եւ այլն: Խնդիր ունենք նաեւ վարձատրման համակարգի հետ կապված: Գաղտնիք չէ, որ եղել է տեսակետ, որ կառավարման համակարգում լավ մասնագետ ներգրավելը բարդ է վարձատրության համակարգով պայմանավորված»,-ասաց նա՝ հավելելով, որ պետք է վերանայել կառավարման համակարգի կառուցվածքը:
Ջանջուղազյանի խոսքով, եղած միջոցները բավարար են, որ օպտիմալացման դեպքում շտկվի վարձատրության համակարգը: Խոսքը մասնավորապես ղեկավար եւ աշխատակից հարաբերակցության մասին է. «Կառավարման տեսության մեջ հայտնի մեկ ղեկավարին 7-11 աշխատակցի հասցնելու պարագայում հնարավորություն կստեղծվի 20-22 տոկոսի չափով բարելավել աշխատավարձի մակարդակը»,-ասաց նա:
«Պետական մարմինների նպատակները պետք է հստակեցվեն: Ակնկալում ենք, որ պետական մարմինների կառուցվածքն ավելի օպտիմալ կլինի այս զարգացումների արդյունքում: հարցը դեռ քննարկման փուլում է:
Ջանջուղազյանը նշեց, որ կան չհիմնավորված կառույցներ, որոնց գործունեությունը պետք է դադարեցվի, այսինքն պետական կառավարման գործառույթները կիրականացնեն միայն պետական կառավարման մարմինները:
