Մենք որոշել ենք սահմանել նոր հասկացություն՝ միկրոբիզնես, որն ընդհանրապես ազատված կլինի հարկերից: Այս մասին, այսօր՝ նոյեմբերի 13-ին, ԱԺ-ում 2019 թվականի բյուջեի նախագծի քննարկման ժամանակ նշեց վարչապետի պաշտոնակատար Նիկոլ Փաշինյանը:
«Այսինքն մարդիկ, որոնք իրենց գործունեությունը կծավալեն 20-24 մլն դրամի սահմաններում, չեն վճարի ոչ մի հարկ: Իհարկե, որոշակի սահմանափակումներ կլինեն կապված գործունեության հետ: Սրանով մենք կփորձենք խրախուսել տնտեսական գործունեությունը հատկապես մարզերում:
Կա երկու մոտեցում. մենք կարող ենք միկրոբիզնեսով զբաղվող եւ խնդիրներ ունեցող մարդկանց ասել, որ ընտրություններից առաջ ձեզ կօգնենք, ընտրակաշառք կբաժանենք, փոխարենը ասում ենք՝ բացում ենք ձեզ համար հնարավորությունը, որ դուք ինքներդ արժանապատիվ աշխատանքով կարողանաք վաստակել ձեր ընտանիքի բարեկեցությունը»,-ասաց Փաշինյանը:
Նա նշեց, որ միկրոբիզնեսում մինչեւ 3 աշխատող ունենալու պարագայում նրանց աշխատողների համար եկամտահարկի բոլորովին այլ ռեժիմ կգործի. ընդամենը 5 հազար դրամի հաստատագրված վճարով կարող են լուծել եկամտահարկի խնդիրը:
Հաջորդ նորարաությունն, ըստ Փաշինյանի այն է, որ մասնավոր տաքսիներին ազատում են արտոնագրային վճարից. «Մենք ասում ենք, որ անհատ տաքսու վարորդները որեւէ վճար վճարելու անհրաժեշտություն չունեն: Այսինքն մարդիկ կարող են աշխատել առանց լիցենզիայի, առանց վճարի: Փորձագիտական գնահատականներով մոտ 50 հազար մարդ զբաղվում է այս գործով: Ստացվում է, որ Երեւանում այդ մարդկանց աշխատավարձն ավելացնում ենք 12 հազար դրամով, իսկ մարզերում՝ 8 հազար դրամով»,-ընդգծեց վարչապետի պաշտոնակատարը: