Քաղաքական դադար չեմ ասի, բայց որոշել եմ չառաջադրվել խորհրդարանական ընտրություններում։ Այս մասին NEWS.am–ի հետ հարցազրույցում ասաց ԱԺ ՀՀԿ խմբակցությունից դուրս եկած եւ Նիկոլ Փաշինյանին աջակցություն հայտնած պատգամավոր Տաճատ Վարդապետյանը։

Ասաց, որ տարբեր ուժերից՝ իրենց ցուցակով առաջադրվելու առաջարկներ եղել են, բայց ինքը որոշել է չմասնակցել ընտրություններին։ Ո՛ր ուժերից՝ նախընտրեց չասել։

Տաճատ Վարդապետյանը Նիկոլ Փաշինյանին աջակցություն հայտնելիս պաշտոնի ակնկալիք չի ունեցել. «Առանց ակնկալիքի չկա՞ աջակցություն, առանց «տորգի» չկա՞ աջակցություն։ Ես ընդամենը ականջալուր եմ եղել բազմահազար ժողովրդի ձայնին»։

Տաճատ Վարդապետյանի համար քաղաքականությունը միայն խորհրդարանով չէ պայմանավորված։

Նա շարունակելու է աջակցել Քաղաքացիական պայմանագրին՝ իր քվեով. «Աջակցություն բառիս բուն իմաստով՝ առանց խախտումների, իր բոլոր դրսեւորումներով՝ քարոզչությունով, համախոհների շրջանակում այդ քարոզչության տարածումով»։

Իր գլխավորած «Վիրահայերի միասնություն» հայրենակցական միությանն էլ կոչ է արել ձայնը տալ «Իմ քայլը» դաշինքին։ Նիկոլ Փաշինյանի կուսակցությանը աջակցում է, որովհետեւ կարծում է, որ դա ժողովրդի ցանկությունն է, իսկ իր ցանկությունը համահունչ է ժողովրդի պահանջին։

Եթե ժողովուրդը հետագայում ցանկանա աջակցել ՀՀԿ–ին, Տաճատ Վարդապետյանի համար եւս կգործի նույն հավատամքը. «Ձայն բազմաց, ձայն Աստծո»։

Հարցազրույցի մանրամասները՝ տեսանյութում։