ՀՀ կենտրոնական բանկի նախագահ Արթուր Ջավադյանը մեկնել է Ալմաթի Ղազախստանի ֆինանսիստների 8-րդ կոնգրեսին մասնակցելու նպատակով:
ԿԲ-ից NEWS.am-ին հայտնում են, որ Կոնգրեսի շրջանակում քննարկվելու են մի շարք հարցեր, մասնավորապես՝ կենտրոնական բանկերի մարտահրավերների, ռիսկերի վրա հիմնված վերահսկողության, կանխիկ դրամաշրջանառության, սպառողների շահերի պաշտպանության, ֆինանսական շուկաների գլոբալ միտումների, ԵՏՄ եւ ԱՊՀ շրջանակում ինտեգրացիոն գործընթացների եւ մի շարք այլ թեմաների վերաբերյալ:
Միջոցառման շրջանակում ԿԲ նախագահը կմասնակցի ԵՏՄ անդամ պետությունների կենտրոնական (ազգային) բանկերի արժութային քաղաքականության խորհրդատվական խորհրդի 18-րդ նիստին՝ ԵՏՄ անդամ-պետությունների ԿԲ նախագահների մասնակցությամբ:
Այցի շրջանակում նախատեսվում են մի շարք երկկողմ հանդիպումներ գործընկեր կառույցների ղեկավարների հետ: ԿԲ պատվիրակությունը մասնակցելու է նաեւ Ղազախստանի ազգային արժույթի՝ տենգեի 25-ամյակին նվիրված հոբելյանական միջոցառումներին: