Հակամարտությունները խոչընդոտում են ՍԾՏՀ ԽՎ-ի ներուժի լիարժեք օգտագործմանը: Այդ մասին Երեւանում կայացած ՍԾՏՀ Գլխավոր ասամբլեայի 52-րդ նիստում հայտարարեց կազմակերպության գլխավոր քարտուղար Ասաֆ Հաջիեւը:
Ասաֆ Հաջիեւը նշեց, որ տարածաշրջանում մեկ քառորդ դար տեւած համագործակցությունը թույլ է տվել կազմակերպությանը բազմաթիվ ոլորտներում փոխգործակցության մեծ փորձ կուտակել: Գյուղատնտեսությունը, տրանսպորտը, զբոսաշրջությունը` հիմնական առաջնահերթություններն են: «Սա արեւելքի եւ արեւմուտքի միջեւ բնական ռեսուրսի կամուրջ է, որը մեծ ներուժ ունի: Սակայն հակամարտությունները խանգարում են տնտեսական համագործակցության լիարժեք ներուժն օգտագործել: Հետեւաբար օրակարգը լիարժեք չէ եւ ոչ այնքան հավակնոտ», - ասաց Հաջիեւը:
Ըստ նրա, կազմակերպությունը պետք է արդիականացվի տարածաշրջանային գլոբալ մարտահրավերների լույսի ներքո՝ ջանքերը կենտրոնացնելով ՍԾՏՀ մարմինների մակարդակում: Հաջիեւը նշեց, որ խորհրդարանականները հատուկ դերակատարում ունեն շոշափելի արդյունքներին հասնելու գործում: