Ղարաբաղյան հակամարտությունը կլինի այն հարցերից մեկը, որոնք կքննարկվեն ԵԱՀԿ արտգործնախարարների խորհրդում։ ՌԴ ԱԳՆ պաշտոնական ներկայացուցիչ Մարիա Զախարովան հայտնել է, որ դեկտեմբերի 6-7-ը Ռուսաստանի ԱԳ նախարար Սերգեյ Լավրովը պատրաստվում է մասնակցել ԵԱՀԿ նախարարների խորհրդի 25-րդ նստաշրջանին, որը կկայանա Միլանում։
«Նախատեսվում է աջակցել հակամարտությունների կարգավորման, այդ թվում Ուկրաինայի արեւելքում, Մերձդնեստրում եւ Լեռնային Ղարաբաղում, ԵԱՀԿ-ի ջանքերին, Բալկաններում նրա աշխատանքին եւ Անդրկովկասում կայունության հարցով Ժնեւի քննարկումներում համանախագահությանը»,- նշել է նա։
Պատասխանելով այն հարցին, թե ծրագրվում է արդյոք ղարաբաղյան հակամարտության կարգավորման համար հետագա քայլերի քննարկում՝ Զախարովան ասել է․ «Եթե մենք խոսում ենք ԵԱՀԿ ԱԳՆԽ նիստում նախարարի ելույթի մասին, ապա այն կներառի ամենը, ինչ կապված է ԵԱՀԿ օրակարգի հետ, հատկապես այն հարցերը, որոնց անմիջականորեն մասնակցում է Ռուսաստանը։ Մենք կհայտնենք մեր գնահատականների մասին։
Իհարկե, կլինեն նաեւ երկկողմ հանդիպումներ, որոնց ընթացքում այս խնդիրը կքննարկվի առավել առարկայական, առավել կիրառական տեսակետից։ Դրանց շրջանակներում կարող են նշվել կոնկրետ քայլեր եւ կոնկրետ առաջարկություններ»։