Առողջապահության համաշխարհային կազմակերպությունն (ԱՀԿ) օրերս հրապարակել է «Առողջապահության եւ ալկոհոլի ոլորտի իրավիճակի գլոբալ զեկույցը»։ Դրանում տրված են տեղեկություններ, թե աշխարհի մոտ 100 երկրներում որքան ալկոհոլ է օգտագործվում 1 շնչի հաշվով եւ ինչ հետեւանքներ է առաջացնում ալկոհոլի չարաշահումը։
Ըստ զեկույցի՝ հայաստանցիները տարեկան օգտագործում են 11,35 լիտր ալկոհոլ, որից 1,05 լիտրը գարեջուր է, 0,39 լիտրը՝ գինի, 9,36 լիտրը՝ այլ խմիչք (հավանաբար՝ օղի)։
Հայերը Հարավային Կովկասում «ամենախմող» ազգն են։ Համեմատության համար՝ Ադրբեջանում յուրաքանչյուր շնչին բաժին է ընկնում 10,6 լիտր ալկոհոլ, իսկ Վրաստանում՝ 6,4 լիտր։ Ընդ որում՝ ադրբեջանցիները նախապատվություն են տալիս գարեջրին՝ 7 լիտր, իսկ վրացիները՝ այլ ոգելից խմիչքներին՝ 2,45 լիտր։
Հարեւաններից իրանցիները օգտագործում են 1 լիտր ալկոհոլ, իսկ թուրքերը՝ 2,87 լիտր։
Ալկոհոլի օգտագործման համաշխարհային միջին մակարդակը 1 շնչի հաշվով 6,1 լիտր է։ Ռեկորդը պատկանում է Մոլդովային՝ 18,22 լիտր։ Այս երկրի բյուջեում նույնիսկ առանձին տող կա՝ ալկոհոլիզմի դեմ պայքար։
Ամենախմող երկրներն են նաեւ Չեխիան՝ 16,45 լիտր, Հունգարիան՝ 16,27 լիտր, Ռուսաստանը՝ 15,76 լիտր, Ուկրաինան՝ 15,6 լիտր, Էստոնիան՝ 15,57 լիտր, Բելառուսը՝ 15,13 լիտր։