ՆԱՏՕ-ի եւ Ռուսաստանի միջեւ քաղաքական երկխոսությունն անհրաժեշտ է, եթե անգամ մոտ ապագայում կողմերի հարաբերությունները չբարելավվեն: Այս մասին երկուշաբթի հայտարարել է ՆԱՏՕ-ի գլխավոր քարտուղար Յենս Ստոլտենբերգը դեկտեմբերի 4-5-ը արտաքին գործերի նախարարների մակարդակով Հյուսիսատլանտյան դաշինքի խորհրդի նիստի նախօրեին տեղի ունեցած մամուլի ասուլիսի ժամանակ, հաղորդում է ՏԱՍՍ-ը:
«Անգամ եթե դուք չեք հավատում ՌԴ հետ մոտ ապագայում հարաբերությունների բարելավմանը, անգամ այդ դեպքում ՌԴ հետ երկխոսությունն անհրաժեշտ է: Այն հարկավոր է վտանգավոր միջադեպերից խուսափելու համար, հակառակ դեպքում իրավիճակը կարող է վերահսկողությունից դուրս գալ եւ շատ վտանգավոր դառնալ», - ասել է նա:
Գլխավոր քարտուղարը հիշեցրել է, որ ՆԱՏՕ-ն ՌԴ հանդեպ երկակի մոտեցում ունի:
«Սա երկխոսություն է եւ պաշտպանություն: Այս համակցությունը կարող է հարմարեցվել տարբեր սցենարներին», - նշել է նա:
«Ինձ համար այս երկակի մոտեցման մեջ հակասություն չկա», - հավելել է Ստոլտենբերգը: