ԵՄ դիվանագիտության ղեկավար Ֆեդերիկա Մոգերինին մտավախություն է հայտնել, որ աշխարհում անվտանգության համար կարեւոր միջազգային պայմանագրերի վիճարկման պատճառով կարող է գերիշխել ջունգլիների օրենքը, ոչ թե օրենքի գերակայությունը, գրում է «ՌԻԱ Նովոստին»:
«Այսօր, ցավում եմ, բայց մենք պետք է խոստովանենք, որ նոր աշխարհակարգը այդպես էլ չիրագործվեց եւ որն ավելի վատ է, այսօր իրական վտանգ կա, որ ջունգլիների օրենքը կփոխարինի օրենքի գերակայությանը: Այսօր կասկածի տակ են դրվում այդ նույն միջազգային պայմանագրերը, որոնք վերջ էին դրել սառը պատերազմին», —Քենեդիի անվան Հարվարդի միջազգային հարաբերությունների դպրոցում ելույթ ունենալիս ասել է նա:
Նրա խոսքով, «նոր աշխարհակարգ ստեղծելու փոխարեն, մենք պետք է այսօր մեր էներգիայի մեծ մասը ներդնենք նախկին կանոների պահպանման գործում»:
Մոգերինին նշել է, որ «եթե մենք ցանկանում ենք պահել բազմակողմ համակարգը, ապա պետք է ներդրումներ կատարենք դրա բարեփոխման համար»:
«Կարծում եմ, որ նման փոփոխությունները կարող են տեղի ունենալ միայն այն դեպքում, եթե Եվրոպան եւ Ամերիկան միասին աշխատեն: Առաջ գնալու այլ ճանապարհ չկա, եթե ուզում ենք փորձել աշխարհում ինչ-որ կարգ ձեւավորել», - ասել է Մոգերինին:
Նա նաեւ հիշատակել է Կերչի նեղուցում տեղի ունեցած իրադարձությունները, որտեղ նոյեմբերի 25-ին Ուկրաինայի նավատորմի երեք նավերը խախտել էին Ռուսաստանի Դաշնության սահմանը:
«Ազովի ծովում ներկայիս իրադարձությունները ես չէի ասի անխուսափելի հետեւանք են, քանի որ նման բաներից միշտ կարելի է խուսափել, բայց եվրոպական տարածքում խաղաղ գոյակցության հիմնական կանոնների ակնհայտ խախտման անմիջական հետեւանք են: Եվրոպան եւ Ամերիկան միասին մատնանշում են այդ խախտումները եւ արձագանքում դրանց», - ասել է նա:
