Եվրամիությունը պետք է անհանգստանա Huawei-ի եւ չինական մյուս տեխնոլոգիական ընկերությունների հետ կապված, քանի որ նրանք կարող են սպառնալիք ներկայացնել ԵՄ ինդուստրիայի եւ անվտանգության համար։ Այս մասին հայտարարել է տեխնոլոգիաների հարցով եվրահանձնակատար Անդրուս Անսիպը՝ տեղեկացնում է Reuters-ը։

Նրա խոսքերով՝ ինքը անհանգստացած է, որ չինական տեխնոլոգիական ընկերությունները պետք է համագործակցեն չինական հատուկ ծառայությունների հետ։ Նա նաեւ ասել է, որ այդ ընկերությունները արտադրում են չիպեր, որոնք կարող են օգտագործվել «մեր գաղտնիքները ստանալու համար»։

Բելգիայում կիբեռանվտանգության կենտրոնը դիտարկել է Huawei-ի արգելման հնարավորությունը՝ հայտնում են L'Echo եւ De Tijd թերթերը։ Ընկերությունը սարքավորումներ է մատակարարում հեռուստակոմունիկացիոն ծառայություններ մատուցող Proximus-ին եւ Orange Belgium-ին։

Կանադայում Huawei-ի ֆինանսական տնօրեն Մեն Վանչժոուի ձերբակալությունը կապված է ԱՄՆ-ում անցկացվող հետաքննության հետ, ըստ որի՝ ընկերությունը բանկային գլոբալ համակարգ է օգտագործել Իրանի դեմ ԱՄՆ-ի պատժամիջոցները շրջանցելու համար։