Միջուկային համաձայնագիրը փրելու փորձերի անհաջողության դեպքում Իրանի պատրաստակամությունը Ֆորդո միջուկային օբյեկտում վերականգնել մինչեւ 20 տոկոս ուրանի հարստացման գործընթացն ամենեւին բլեֆ չէ: Այս մասին հայտարարել է Իրանի Ատոմային էներգիայի կազմակերպության ղեկավար Աքբար Սալեհին, փոխանցում է Tasnim-ը:
Նրա խոսքով՝ չնայած Իրանը համաձայնվել է իր միջուկային ծրագիրը սահմանափակել 2015 թվականի միջուկային գործարքի շրջանակում, նման սահմանափակումները չեն խոչընդոտում «միջուկային արդյունաբերության խաղաղ գործունեությանը»: «Ներկայումս մենք Ֆորդոյում 1044 ցենտրիֆուգ ունենք, եւ եթե ցանկանանք, ապա կվերականգնենք ուրանի 20-տոկոսանոց հարստացումը»,- ասել է նա:
Սալիհին հույս է հայտնել, որ միջուկային համաձայնագրի մյուս մասնակիցները կկատարեն իրենց պարտավորությունները եւ կլրացնեն այն բացը, որը ստեղծել է ԱՄՆ-ն Համատեղ համապարփակ գործողությունների ծրագրի պայմանագրից միակողմանի դուրս գալուց հետո: Հակառակ դեպքում Իրանը ստիպված կլինի իր պարտավորությունները կրճատել: «Ցանկանում եմ շեշտել, որ սա բլեֆ չէ: Ես եւս մեկ անգամ ընդգծում եմ, որ մենք կարող ենք հեշտորեն վերադառնալ ուրանի 20-տոկոսանոց հարստացմանը եւ ցանկացած մակարդակում բավարարել երկրի պահանջմունքները»,- եզրափակել է Սալեհին:
