Կոսովոյի խորհրդարանը քվեարկել է 5 հազար մարդ թվաքանակով կանոնավոր բանակ ստեղծելու օգտին՝ Սերբիայի վարչապետի այն հայտարարությունից մեկ շաբաթ հետո, որ այս քայլը կարող է սադրել Բելգրադի ռազմական ինտերվենցիա, փոխանցում է Reuters-ը:
ԱՄՆ-ն այս քայլը «պատմական» է անվանել, մինչդեռ ՆԱՏՕ-ն քննադատել է՝ այն անօգուտ անվանելով Կոսովոյի եւ Սերբիայի միջեւ լարվածության նվազեցման ջանքերի ենթատեքստում:
Օրենսդրությունը հաստատել են խորհրդարանի 120 պատգամավորներից 105-ը: Սերբ փոքրամասնության 11 ներկայացուցիչներ քվեարկությունը բոյկոտել են:
Չնայած բանակի ստեղծումը կարող է տարիներ տեւել, սերբ քաղաքական գործիչները պնդում են, որ այն կարելի է օգտագործել Կոսովոյից մնացյալ սերբերին արտաքսելու համար. Պրիշտինայում այս մեղադրանքը հերքում են:
Նոր օրենքի ընդունմամբ Կոսովոն կստեղծի պաշտպանության նախարարություն, իսկ ապագա բանակը կազմված կլինի 5 հազար զինվորից եւ 3 հազար պահեստազորայիններից: Պրիշտինայի կառավարական պաշտոնյաները հայտարարել են, որ գործընթացը կտեւի առնվազն 10 տարի:
