Գյումրիում դեկտեմբերի 3-ին 57-ամյա կոնջը դաժան ծեծի ենթարկելու մեջ մեղադրվող ռուսական 102-րդ ռուսական ռազմաբազայի զինծառայողը պետք է դատապարտվի հայկական դատարանում: Այս մասին այսօր՝ դեկտեմբերի 15-ին Ծաղկաձորում կայացած ասուլիսին հայտարարեց ԱԱԾ տնօրեն Արթուր Վանեցյանը՝ շեշտելով, որ եթե սպանությունը կատարվել է Հայաստանի տարածքում, ապա տվյալ անձը պետք է դատապարտվի Հայաստանի դատարանի կողմից:
«Մարդասպանը չունի ազգություն, չունի պատկանելություն, այս կամ այն մասնագիտությանը, մարդասպանը մնում է մարդասպան և պետք է դատապարտվի», - ասաց Վանեցյանը։
Ավելի վաղ հայտնել ենք, որ դեկտեմբերի 3-ին դաժան սպանություն է տեղի ունեցել Գյումրիի Սլաբոտկա թաղամասում: Անհայտ անձը դաժան ծեծի էր ենթարկել նույն թաղամասի մի բնակչուհու, որը մարմնական բազմաթիվ վնասվածքներով տեղափոխվել է «Գյումրի» կենտրոն, որտեղ գիտակցության չգալով՝ մահացել է: Սպանվածը Գյումրիի քաղաքապետարանի բնակկոմունալ բաժնի աշխատակից է: Նա ընդգրկված է Տիգրան Մեծ փողոցում աշխատող հավաքարարների բրիգադում: Սպանությունը տեղի էր ունեցել այն ժամանակ, երբ կինը գնում էր աշխատանքի:
Դեպքի առթիվ Շիրակի մարզային քննչական վարչությունում հարուցվել է քրեական գործ՝ ՀՀ Քրեական օրենսգրքի 112-րդ հոդված 2-րդ մասի 14-րդ կետի հատկանիշներով, այն է՝ դիտավորությամբ առողջությանը ծանր վնասվածք պատճառելը, որն անզգուշությամբ առաջացրել է տուժողի մահը։ Շիրակի մարզի ընդհանուր իրավասության դատարանի որոշմամբ ռուս զինծառայողը կալանավորվել է:
