Mercedes-Benz ընկերությունը հայտնել է իր նոր CLA-ն CES ցուցահանդեսում ներկայացնելու մասին։ Այն տեղի կունենա 2019թ․ հունվարի 8-11-ը։ Արտադրողը նաեւ ցույց է տվել ավտոմեքենայի առաջին լուսանկարը՝ տեղեկացնում է Motor-ը։
Նոր Mercedes-Benz CLA-ի մասին տեղեկատվությունը դեռեւս քիչ է։ Ընկերությունը հայտնում է, որ մոդելը իր դասի ավտոմեքենաներից «ամենազգացմունքայինն ու խելացին» է։ Այն կունենա MBUX լրատվական-զվարճալի համակարգի թարմացված տարբերակը՝ Interior Assistant ֆունկցիայով, որը շարժման հիման վրա կարող է կռահել վարորդի մտադրությունը, ինչպես նաեւ՝ վիրտուալ ֆիթնես-մարզիչ։
Autocar-ի տվյալներով՝ նոր մոդելի առջեւի մասը մի փոքր սրացված է, դիմապակու թեքությունն ավելացված է, դռներն առանց շրջանակի են։ Դիզայնը կատարվել է «զգացական մաքրության» սկզբունքով՝ մեծ թվով հարթ, պարզ մակերեւույթներով։