Գերմանիայում մեծ սկանդալ է բարձրացել հեղինակավոր Spiegel ամսագրի շուրջ: Ինչպես պարզվել է, ամսագրի լրագրող Клаас Релотиус-ը հոդվածը գրելու ժամանակ կեղծել է բազմաթիվ հատվածներ եւ ամբողջական պատմություններ, հնարել է հերոսների, աչք փակել փաստերի վրա, փոխանցում է ՏԱՍՍ-ը:
Ինչպես նշում է ամսագիրը, որոշ նյութեր մրցանակի են արժանացել: Շատ հոդվածներ հետագայում վերահրապարակվել են խոշոր գերմանական թերթերի եւ հրատարակությունների կողմից:
Առաջին կասկածներն առ այն, որ լրագրողն իր գործն անբարեխիղճ է կատարում, ի հայտ են եկել նրա գործընկերոջ մոտ՝ այս տարվա նոյեմբեր ամսին Մեքսիկայի հետ սահմանին ամերիկյան քաղաքացիական պաշտպանության ջոկատների ստեղծման մասին «Որսորդի սահմանները» տեքստի հրապարակումից հետո:
Լրագրող Խուան Մորենոն, որը Ռելոթիուսի հետ հոդվածի համար նյութ հավաքելիս է եղել, նկատել է տեքստում առկա անհամապատասխանությունները եւ հայտնել իր կասկածների մասին Spiegel-ի իր այլ գործընկերներին: Սկզբում Մորենոն բախվել է ըմբռնման կատարյալ բացակայության. Նրան ոչ ոք չի հավատացել, բայց նա շարունակել է ջանքեր գործադրել Ռելոթիուսին բացահայտելու, նաեւ իր բարի անունը փրկելու ուղղությամբ: ԱՄՆ գործուղման ժամանակ Մորենոն սկսել է հավաքել ապացույցներ առ այն, որ վերջինս փաստացի ստել է և մանիպուլիացիայի ենթարկել փաստերը, այնուհետեւ ներկայացրել է է իր հավաքած տեղեկությունները Spiegel-ին:
Սկզբում Ռելոթիուսը հերքում էր տեքստում առկա ամբողջական հատվածների կեղծումը, բայց անցած շաբաթվա վերջին նա, ի վերջո, ընդունեց ամեն ինչ: Պարզվեց, որ իր հոդվածների գործող կերպարների մեծ մասի հետ նա երբեք չի հանդիպել: Մի շարք պատմություններ նա վերցրել է այլ լրատվամիջոցներից եւ տեսանյութերից: Գոյություն չունեցող մարդկանց համար նա հորինել է կեղծ կենսագրություններ, նրանց հետ երկխոսություններ ունեցել, որոնք իրականում չեն եղել, ինչպես նաև մանրամասներն ու բերված օրինակներն է հնարել:
Նախ Ռելոթիուսը Spiegel-ի համար գրել է որպես անկախ լրագրող, բայց մի քանի տարի է արդեն, ինչ աշխատելիս է եղել ամսագրում մշտական հիմունքներով: 2011 թվականից ի վեր նա հրապարակել է մոտ 60 տեքստ: Իր իսկ խոստովանությամբ, առնվազն 14 հոդվածներում առկա են մտացածին պատմություններ կամ հերոսներ: Spiegel-ը սկսել է նրա գործողությունների շուրջ սեփական ստուգումները։ Ստեղծվել է հանձնաժողով, որտեղ ներգրավվել են ոչ միայն ամսագրի փորձառու աշխատակիցները, այլեւ կողմնակի փորձագետներ։ Նրանք կծանոթանան անբարեխիղճ լրագրողի «գրչի տակից» դուրս պրծած բոլոր տեքստերին:
