Դեկտեմբերի 26-ին Հայաստանի ԱԳ նախարարությունում անցկացվել է լրագրողական մրցույթ՝ ուղղված թրաֆիքինգի եւ մարդկանց ապօրինի շահագործման դեմ պայքարին:
Հայաստանի Հանրապետության Թրաֆիքինգի եւ ապօրինի շահագործման դեմ պայքարի խորհրդի հայտարարած ամենամյա լրագրողական մրցույթի արդյունքները որոշել է Թրաֆիքինգի եւ մարդկանց ապօրինի շահագործման դեմ պայքարի հարցերով հատուկ աշխատանքային խմբի փորձագետներից կազմված ժյուրին, որի կազմի մեջ են մտել նաեւ լրագրողներ:
Հաղթողները սերտիֆիկատներ եւ դրամական պարգեւներ են ստացել «Առցանց եւ տպագիր լրատվամիջոցներ» եւ «Հեռուստատեսություն եւ ռադիո» անվանակարգերում:
Մրցույթն անցկացվում է արդեն 7-րդ տարին, եւ արդեն երկրորդ տարին անընդմեջ չի հաջողվում ընտրել «Հեռուստատեսություն եւ ռադիո» անվանակարգում հաղթողին: Մրցույթի կազմակերպիչները սա պատճառաբանում են նրանով, որ այս ոլորտի ներկայացուցիչները թրաֆիքինգի եւ մարդկանց ապօրինի շահագործման դեմ պայքարի թեմայով ընդամենը երկու նյութ էին ներկայացրել: Չնայած հաղթողի բացակայությանը, այս անվանակարգում երկրորդ տեղը զբաղեցրել է «ԱՐ» հեռուստաընկերությունից Քրիստինե Ոսկանյանը:
Հարկ է նշել, որ երրորդ տեղը նույնպես թափուր է մնացել:
«Առցանց եւ տպագիր լրատվամիջոցներ» անվանակարգում ամեն ինչ ավելի բարեհաջող էր: Այստեղ, համենայնդեպս, հաղթող եղավ՝ OC Media ծառայությունից լրագրող Արմինե Ավետիսյանը: Չնայած հաղթողի առկայությանը, այս անվանակարգում չհաջողվեց որոշել «արծաթե մրցանակակրին»:
Երրորդ տեղը զբաղեցրել են Հայաստանի հնագույն լրատվական գործակալություն «Արմենպրեսի» լրագրող Լիլիթ Դեմուրյանը, ինչպես նաեւ «Լեգալ Ինֆոյից» Ելենա Արամյանը:
Հարկ է նշել, որ առաջին տեղի հաղթողին հանձնվում էր արձանիկ, սերտիֆիկատ, ինչպես նաեւ 200 հազար դրամ: Երկրորդ տեղը գրավողներին՝ սերտիֆիկատ եւ 170 հազար դրամ, իսկ «բրոնզե» մրցանակակրին՝ սերտիֆիկատից բացի, նաեւ 130 հազար դրամ: