ՀՀ գլխավոր դատախազ Արթուր Դավթյանն այսօր ընդունել է Հայաստանի Հանրապետությունում Իրանի Իսլամական Հանրապետության արտակարգ եւ լիազոր դեսպան Սեյեդ Քազեմ Սաջադիին:
Դատախազությունից NEWS.am-ին հայտնում են, որ Արթուր Դավթյանը նախ շնորհակալություն է հայտնել դեսպանին այս տարվա նոյեմբերին բարեկամ Իրան կատարած ՀՀ գլխավոր դատախազի բարձր մակարդակով կայացած այցին լուրջ աջակցություն ցուցաբերելու համար: Նա նշել է, որ այցը նոր փուլ է նախանշել իրավական ոլորտում հայ-իրանական հարաբերությունների զարգացման առումով, իսկ Թեհրանում երկու երկրների գլխավոր դատախազների կողմից ստորագրված համագործակցության հուշագիրը լուրջ խթան կհանդիսանա թե՛ համակարգային եւ թե՛ դատախազների անձնական հարաբերությունների մակարդակներով շփումներն ավելի զարգացնելու համար:
ՀՀ գլխավոր դատախազը տեղեկացրել է, որ հուշագրով 2019թ. համար նախատեսված՝ Հայաստանում անցկացվելիք միջոցառումների կազմակերպման ուղղությամբ արդեն իսկ ձեռնարկվում են գործնական քայլեր: Դրանք վերաբերում են հանձնման եւ քրեական գործերով իրավական օգնության ցուցաբերման բնագավառում համագործակցության գործնական հարցերին, թմրամիջոցների մաքսանենգության եւ ապօրինի շրջանառության, ինչպես նաեւ ապօրինի սահմանահատումների եւ ապօրինի միգրացիայի դեպքերով հարուցված քրեական գործերի քննությունների, հանցավոր ճանապարհով ստացված ակտիվների հայտնաբերման եւ արտերկրից վերադարձման ուղղություններով գործակցությանը եւ աշխատանքային փորձի փոխանակմանը:
ՀՀ գլխավոր դատախազը նաեւ հավելել է, որ Իրանի իր գործընկերոջը՝ գլխավոր դատախազ Մոհամադ Ջաֆար Մոնթազերիին հրավիրել է այց կատարել Հայաստան, եւ ուրախ կլինի, եթե հուշագրով նախատեսված համատեղ միջոցառումների մեկնարկը Երեւանում նրա հետ տան միասին:
Շնորհավորելով հայ ժողովրդին գալիք Ամանորի եւ Սուրբ Ծննդյան տոների կապակցությամբ՝ դեսպան Սաջադին շեշտել է, որ դեսպանության եւ ՀՀ գլխավոր դատախազության միջեւ ձեւավորված հարաբերություններն օրինակելի են, իսկ երկու երկրների միջեւ իրավական ոլորտում կապերն ամրապնդվում են երկու դարավոր բարեկամ երկրների միջեւ տարբեր ուղղություններով զարգացող հարաբերություններին համահունչ:
Նա երկու երկրների իրավապահ մարմինների միջեւ համագործակցության խորացումը կարեւորել է հատկապես վիզային ռեժիմի դյուրացումից հետո երկու երկրների քաղաքացիների բավականին ակտիվացած փոխայցելությունների համատեքստում միմյանց քաղաքացիների իրավունքների պաշտպանության, անվտանգության ապահովման տեսանկյունից: Դեսպանի կարծիքով կարեւոր ձեռքբերում կարելի է համարել մեղադրյալների, հետախուզման մեջ գտնվող անձանց հանձնման ոլորտում ձեւավորված պրակտիկան:
Բավականին ջերմ, անմիջական մթնոլորտում անցած հանդիպման ընթացքում կողմերը քննարկել են քրեական գործերով իրավական փոխօգնությանը, երկու երկրների իրավապահ մարմինների փոխգործակցությանը վերաբերող, ինչպես նաեւ փոխադարձ հետաքրքրություն ներկայացնող այլ հարցերի լայն շրջանակ:
Պայմանավորվածություն է ձեռք բերվել հաջորդ տարվա ընթացքում համագործակցության կոնկրետ ուղղություններով ավելի ինտենսիվ դարձնել հաղորդակցությունը: