Ավստրալիան քաղաքացիությունից զրկել է ԻՊ-ին աջակցելու մեջ կասկածվող տղամարդուն: Կասկածյալը ներկայումս գտնվում է Թուրքիայում:
Ավստրալիայի ՆԳ նախարար Պիտեր Դաթոնը հայտարարել է, որ Նիլ Պրաքաշը ծառայել է ահաբեկչական կազմակերպությանը, հաղորդում է AP-ն:
Նա դարձել է 12-րդ մարդը, որը զինյալների հետ կապերի պատճառով զրկվել է Ավստրալիայի քաղաքացիությունից:
«Այս կառավարությունը մտադիր է պայքար մղել օտարերկրյա զինյալ-ահաբեկիչների դեմ», -ասել է Դաթոնը:
««Իսլամական պետությունը» դեմ է արտահայտվում Ավստրալիային, մեր շահերին, արժեքներին, ժողովրդավարական համոզմունքներին, իրավունքներին եւ ազատություններին»:
Ավստրալիան Թուրքիայից պահանջում է արտահանձնել Պրաքաշին, որին իր հարազատ Վիկտորիա նահանգում ահաբեկչական դավադրության մեղադրանք է սպառնում:
Սակայն արտահանձնմանը պետք է սպասել, մինչեւ Թուրքիայում կավարտվի Պրաքաշի դեմ քրեական դատավարությունը, որին ազատազրկում է սպառնում այն բանից հետո, երբ նա 2016-ին կալանավորվել էր Սիրիայի սահմանից քիչ հեռու՝ կեղծ փաստաթղթերով Թուրքիա մտնելու փորձի համար:
Պրաքաշն ավելի վաղ խոստովանել էր, որ ԻՊ անդամ է:
Կառավարությունը հայտարարում է, որ 27-ամյա տղամարդը սպառնալիք է ներկայացնում Ավստրալիայի եւ Ասիա-Խաղաղօվկիանոսյան տարածաշրջանի համար:
