ԱՄՆ-ի Ֆլորիդա նահանգում ոստիկանության աշխատակիցները ձերբակալել են 4 մարդու, որոնք առեւանգել էին տեկիլով բեռնված կիսակցորդը: Առեւանգած բեռի արժեքը 500 հազար դոլար է գնահատվում:
Դեպքը տեղի է ունեցել 2018 թվականի վերջին օրը, հաղորդում է ՏԱՍՍ-ը: Ալկոհոլի խմբաքանակը տեղափոխող վարորդը սնվելու նպատակով հեռացել էր մեքենայից: Վերադառնալով կայանատեղի՝ նա հայտնաբերել էր, որ կիսակցորդը, որտեղ տեկիլայով 966 տուփ կար, առեւանգել են:
Ոստիկանները սկսել էին բեռնատարի որոնումները եւ քիչ հետո հայտնաբերել 4 տղամարդու, որոնք ալկոհոլային խմիչքով տուփերը իրենց անունով գրանցված ֆուրգոն էին տեղափոխում: Նրանցից երեքը կալանավորվել էին տեղում, չորրորդը փորձել էր թաքնվել, սակայն բռնվել էր:
