Ամերիկյան բժիշկ, «Ավրորա»-ի մրցանակակիր Թոմ Կատենան Երեւանում պաշտոնապես գրանցել է իր ամուսնությունը կնոջ՝ Նասիմայի հետ։ Այս մասին Կատենան հայտնել է Twitter-ի իր միկրոբլոգում։
«Ես այնքան երջանիկ եմ, որ վերջապես Նասիմայի հետ մեր ամուսնությունը պաշտոնապես գրանցվել է Հայաստանում։ Շնորհակալություն բոլորին, որ մեզ հետ էին այս հատուկ օրը»,- գրել է նա։
So happy to finally have our marriage with Nasima officially registered in Yerevan, Armenia. Thank you all for being with us on this special day. pic.twitter.com/2Hn7yafk8P
— Tom Catena (@CatenaTom) January 8, 2019
Թոմաս Կատենան ամերիկացի բժիշկ է, ով 2008-ից աշխատում է Սուդանի Նուբյան լեռներում։ 2017թ․ մայիսի 28-ին նրան շնորհվել է «Ավրորա» մրցանակ՝ «Մարդկության զարթոնքի» համար։
Վերջին տասը տարիների ընթացքում դոկտոր Կատենան ապրել է պատերազմից ամայացած Սուդանի տարածքում, որտեղ հումանիտար օգնություն համարյա չի հասնում։ Տեղացիները, որոնց բոլոր հիվանդությունները, այդ թվում՝ մալարիան եւ բեկորային վնասվածքները, նա բուժում է, Կատենային «բժիշկ Թոմ» են անվանում։ Թոմ Կատենան կպահպանի հիվանդանոցի գլխավոր բժշկի պաշտոնը եւ կհամագործակցի կաթոլիկ բժշկական առաքելության Խորհրդի հետ, որին բուժանձնակազմով աջակցում է «Աֆրիկյան բժշկական առաքելություն» հիմնադրամը, որպեսզի շարունակի աշխատել Նուբյան լեռներում՝ այդ աշխատանքը զուգակցելով «Ավրորա»-ի Հումանիտար նախաձեռնության նախագահի գործունեության հետ։
