Ես ինը տարի աշխատել եմ Եվրոպական ինտեգրման հարցերով մշտական խորհրդարանական հանձնաժողովում եւ նույնպես մտահոգված եմ Հայաստանի եւ ԵՄ-ի միջեւ համապարփակ գործընկերության համաձայնագրի հարցով: Այս մասին հունվարի 16-ին Ազգային ժողովի նիստում հայտարարեց Մարդու իրավունքների եւ հանրային հարցերով մշտական խորհրդարանական հանձնաժողովի նախագահի թեկնածու, «Բարգավաճ Հայաստան» կուսակցության պատգամավոր Նաիրա Զոհրաբյանը:
Նրա խոսքով, իսկապես տեմպերի անկում կա: «Ես հասկանում եմ, որ մայիսին Եվրախորհրդարանի ընտրություններ կլինեն, բայց եթե մենք իսկապես պրոֆեսիոնալ դիվանագիտական կորպուս ունենայինք, այլ ոչ թե դիվանագետներ, որոնց մեծամասնությունը, ավելի շատ, գործարարներ են եղել, որոնք զբաղված էին ԵՄ տարբեր երկրներում իրենց անձնական շահերի սպասարկմամբ, հնարավոր է մենք այսօր բոլորովին այլ իրականություն ունենայինք», - բացատրեց Զոհրաբյանը:
Նա հույս հայտնեց, որ մոտ ապագայում առավելագույնը կարվի Հայաստանի եւ ԵՄ-ի միջեւ համապարփակ գործընկերության համաձայնագրի վավերացման համար: