ԱՄՆ-ում ձերբակալվել է մի տղամարդ, որը պատրաստվում էր հարձակվել Սպիտակ տան վրա՝ օգտագործելով հակատանկային հրթիռ եւ պայթուցիկ՝ հայտնում է AP-ն։
21-ամյա Հաշեր Ջալալ Թահեբ Կամինգը ձերբակալվել է ՀԴԲ-ի հատուկ գործողության արդյունքում։ Նա մեղադրվում է Միացյալ Նահանգներին պատկանող շենքը վնասելու կամ ավերելու փորձի մեջ։
Իրավապահները Թահեբով հետաքրքրվել են անցյալ տարվա մարտին, երբ տեղեկատվություն են ստացել, որ նա արմատականացել է, փոխել է անունը եւ ծրագրում է մեկնել արտասահման։ Թահեբը թաքնված գործակալին ասել է, որ երբեք չի կրակել ատրճանակից, սակայն կարող է շուտ սովորել, ինչպես նաեւ մի քանի տեսանյութ է դիտել ռումբեր պայթեցնելու մասին։ Նա ծրագրում էր մեկնել եւ միանալ «Իսլամական պետությանը»։
Սակայն նա չէր կարող լքել երկիրը, քանի որ անձնագիր չուներ, այդ պատճառով որոշել է հարձակվել Սպիտակ տան եւ Ազատության արձանի վրա։
Ըստ քննիչների՝ անցյալ շաբաթ Թահեբը պատրաստվում էր վերցնել զենքը եւ մեկնել Վաշինգտոն՝ գրոհ իրականացնելու համար։
Թահեբի ծրագրով՝ իրենք պետք է Սպիտակ տանը մոտենային հետնամուտքից, որպեսզի շեղեին ոստիկանների ուշադրությունը, այնուհետեւ պետք է ներս մտնեին եւ հակատանկային զենքի միջոցով պայթեցնեին դուռը, հետո որքան հնարավոր է շատ մարդու սպանեին եւ որքան հնարավոր է շատ վնասներ հասցնեին։