Անհայտ անձինք պայթուցիկ են նետել ուկրաինական Սումի քաղաքի Սպասո-պրեոբրաժենսկյան մայր տաճար։ Այս մասին հաղորդվում է Սումի մարզի ազգային ոստիկանության կայքում։

Միջադեպը տեղի է ունեցել Մոսկվայի պատրիարքության Ուկրաինական Ուղղափառ եկեղեցու երեկոյան ժամերգության ժամանակ։ Տաճարի սպասավորը ոստիկանությանը հայտնել է, որ շենքի մուտքի մոտ պայթուցիկ են նետել, որը պայթել է։ Նշվում է, որ տաճարը չի վնասվել, տուժածներ չկան։

Պատահարի վայր են շտապել պայթուցիկ տեխնիկայի մասնագետներ եւ հետաքննչական օպերատիվ խումբը։ Պարզվել է, որ պայթուցիկը եգիպտացորենի հատիկներով սթրայկբոլ խաղալու համար նախատեսված միջոց է եղել։

Սույն փաստով ոստիկանությունում հարուցվել է քրեական գործ «Խուլիգանություն» հոդվածով։