Գերմանիայի կանցլեր Անգելա Մերկելը հայտարարել է, որ կարգավորված Brexit-ը Լոնդոնի եւ ԵՄ միջեւ համաձայնության հիման վրա իր համար գերակա է մնում, տեղեկացնում է ՏԱՍՍ-ը։
Կանցլերի ելույթի հեռարձակումը Ռոստոկում Քրիստոնեա-դեմոկրատական միության միջոցառման ժամանակ շաբաթ օրը ցուցադրել են գերմանակն հեռուստաալիքները։
«Ես մինչեւ վերջին օրը կաշխատեմ, որպեսզի Brexit-ը իրականանա պայմանավորվածությունների հիման վրա, որպեսզի մենք ամենալավ հարաբերություններն ունենանք հետագայում»,- նշել է կանցլերը։
Նրա խոսքով՝ Մեծ Բրիտանիան Եվրոպայի մի մասն է, բայց երկրի բնակիչների ընտրությունը, որն արվել է հանրաքվեի ժամանակ, պետք է հարգել։
Բրիտանական խորհրդարանի Համայնքների պալատի պատգամավորները երեքշաբթի օրը մերժել են ԵՄ-ի հետ Brexit-ի պայմանների մասին համաձայնագրի նախագիծը, որն անցած տարվա նոյեմբերին արժանացել էր Լոնդոնի եւ Բրյուսելի հավանությանը։