Եվրոպայի խորհրդի խորհրդարանական վեհաժողովի (ԵԽԽՎ) նստաշրջանի առաջին մասի աշխատանքներին մասնակցելու համար 2019 թվականի հունվարի 20-26-ը ներառյալ Ստրասբուրգ (Ֆրանսիայի Հանրապետություն) է գործուղվել ԵԽԽՎ-ում ԱԺ պատվիրակությունը՝ ողջ կազմով:
ԱԺ-ից NEWS.am-ին հայտնում են, որ Ստրասբուրգ են մեկնել, մասնավորապես, պատվիրակության ղեկավար Ռուբեն Ռուբինյանը, պատվիրակության անդամներ Վլադիմիր Վարդանյանը, Նաիրա Զոհրաբյանը, Միքայել Մելքումյանը, Էդմոն Մարուքյանը, Հովհաննես Իգիթյանը, Տաթեւիկ Հայրապետյանը եւ Սոս Ավետիսյանը:
Նշենք, որ ԵԽԽՎ-ում հայկական պատվիրակության հիմնական կազմում ընդգրկված են Ռուբեն Ռուբինյանը, Հովհաննես Իգիթյանը, Էդմոն Մարուքյանն ու Նիրա Զոհրաբյանը: Մնացած 4-ը փոխարինող կազմում են ընդգրկված:
Ավելի վաղ NEWS.am-ը հայտնել էր, որ ԵԽԽՎ ձմեռային նստաշրջանի օրակարգում է Հայաստանում դեկտեմբերի 9-ին կայացած արտահերթ խորհրդարանական ընտրությունների դիտարկման հարցը:
Նստաշրջանի օրակարգում է նաեւ Ադրբեջանում քաղաքական բանտարկյալների հարցը: Մասնավորապես, քննարկման թեմա է դառնալու ադրբեջանական բանտերում գտնվող մեկ տասնյակ բլոգերների, քաղաքացիական ակտիվիստների հարցը, որոնք անժամկետ հացադուլ են սկսել:
Բացի այդ, հունվարի 21-ի նիստի ընթացքում նախատեսվում է ԵԽԽՎ նախագահի եւ փոխնախագահների ընտրություն: ԵԽԽՎ օրակարգում է նաեւ ԵԽ գլխավոր քարտուղար Թորբյորն Յագլանդին անվստահություն հայտնելու հարցը. նրան մեղադրում են ռուսական շահը պաշտպանելու մեջ: