Հունվարի 14-ից 20-ը ՀՀ արտակարգ իրավիճակների նախարարության փրկարար ծառայության  մարզային ստորաբաժանումներն իրականացրել են մի շարք փրկարարական գործողություններ ՀՀ ավտոճանապարհների փակ եւ դժվարանցանելի հատվածներում՝ ապահովելով քաղաքացիների անխափան տեղաշարժը: Արագածոտնի մարզի Արագած, Բերքառատ, Ալագյազ համայնքներում նախորդ շաբաթվա մի քանի օրերի ընթացքում ահազանգեր են ստացվել այն մասին, որ գյուղի մոտակայքում ավտոմեքենաները դուրս են եկել ճանապարհի երթեւեկելի հատվածից ու արգելափակվել ձյան շերտում. դուրս բերելու համար անհրաժեշտ է փրկարարների օգնությունը: Մեքենաների արգելափակման առավել շատ՝ շուրջ մեկ տասնյակ դեպքեր նախորդ շաբաթվա ընթացքում գրանցվել են մարզի Ապարան համայնքի ավտոճանապարհներին: Կանչի վայր հասած հրշեջ-փրկարարները դուրս են բերել ավտոմեքենաներն արգելափակումից եւ ուղեւորներին ցույց տվել անհրաժեշտ օգնություն:

Հունվարի 17-ին Ծաղկահովիտի ԲԿ-ից տեղեկատվություն է ստացվել այն մասին, որ Ճարճակիս գյուղի ավտոճանապարհը փակ է,  գյուղում կան վատառողջ երեխաներ, որոնց անհրաժեշտ է տեղափոխել բժշկական կենտրոն: Երեխաներին շտապօգնության ավտոմեքենային մոտեցնելու համար անհրաժեշտ է եղել փրկարարների օգնությունը: Փրկարարները երեխաներին մոտեցրել են շտապօգնության ավտոմեքենային: Նույն օրը փրկարարների օգնությամբ Ծաղկահովիտի ԲԿ-ում բուժում ստացած 13 երեխաների եւ երկու մեծահասակների հնարավոր է եղել անվտանգ հասցնել իրենց բնակավայր՝ Ճարճակիս:

Կոտայքի մարզում մեքենաների արգելափակման ահազանգեր ստացվել են Հրազդան եւ Ծաղկաձոր համայնքներում, որոնց արձագանքել են ԱԻՆ մարզային փրկարարական ստորաբաժանումները: Հունվարի 14-ից 20-ը  Շիրակի մարզում՝ Աշոցք, Կրասար, Ցողամարգ համայնքների ավտոճանապարհների փակ հատվածներից փրկարարներն արգելափակումից դուրս են բերել շուրջ մեկ տասնյակ ավտոմեքենա՝ ուղեւորներին ցուցաբերելով համապատասխան օգնություն: Ձնակույտերում մեքենաների արգելափակման դեպքեր գրացվել են նաեւ Վայոց ձորի, Գեղարքունիքի եւ Սյունիքի մարզերում, որոնց ցուցաբերվել է համապատասխան արձագանքում:

Հունվարի 17-ին ահազանգ է ստացվել, որ Սիսիան-Գորիս ավտոճանարպարհին՝ ԱԻն հենակետի մոտակայքում, ավտոմեքենան արգելափակվել է ձյան շերտում: Գորիսի հենակետից դեպքի վայր է մեկնել մեկ մարտական հաշվարկ: Հրշեջ-փրկարարները Սիսիան-Շամբ ավտոճանապարհի 10-րդ կմ-ում արգելափակումից դուրս են բերել «UAZ» մակնիշի ավտոմեքենան: Նույն օրը Ջամշլու գյուղի մոտակայքում արգելափակված «VAZ-2121» մակնիշի ավտոմեքենան ձնակույտից դուրս բերելու համար օգնության է մեկնել Արագածոտնի մարզի Ալագյազի հենակետից մեկ մարտական հաշվարկ: Հրշեջ-փրկարարներն Ալագյազ-Սպիտակ ավտոճանապարհի 5-րդ կմ-ին արգելափակումից դուրս են բերել նշված ավտոմեքենան: 

ՀՀ ԱԻ նախարարությունը մեկ անգամ եւս հորդորում է երթեւեկել բացառապես ձմեռային անվադողերով, ինչպես նաեւ հիշեցնում՝ ձնաբքի ժամանակ մարդկանց եւ տրանսպորտային միջոցներն անվտանգ տարածք տեղափոխելու եւ առաջին օգնություն ցուցաբերելու նպատակով Սյունիքի, Գեղարքունիքի եւ Արագածոտնի մարզերում տեղակայվել են ժամանակավոր հենակետեր.

Սյունիքի մարզի Գորայք համայնքի տարածքում եւ Սիսիան-Գորիս միջպետական ավտոճանապարհի 17-րդ կիլոմետրի վրա,

Արագածոտնի մարզի Ապարան-Սպիտակ ավտոճանապարհի 12-րդ կիլոմետրի վրա՝ Ալագյազ համայնքի վարչական տարածքում,

Գեղարքունիքի մարզի Վարդենիս-Մարտակերտ հանրապետական ավտոճանապարհի 27-րդ կիլոմետրի վրա: