Եվրոպական խորհրդարանի Հարավային Կովկասի հետ համագործակցության հարցերով պատվիրակության ղեկավար Սաջադ Քարիմը համոզված է, որ Հայաստանն առաջնային տեղ կզբաղեցնի ԵՄ արտաքին քաղաքականության օրակարգում։ «ԵՄ-ի եւ Հայաստանի միջեւ համաձայնագիրը պետք է վավերացվի ԵՄ անդամ բոլոր երկրներում եւ իրականացվի ի բարօրություն ԵՄ եւ Հայաստանի քաղաքացիների»,- Եվրախորհրդարանի արտաքին գործերի հանձնաժողովի նիստում նշել է Քարիմը։ Նիստում ներկայացվել է Հայաստանում արտահերթ խորհրդարանական ընտրությունների դիտորդության մասին զեկույցը։
«ԵՄ-Հայաստան խորհրդարանական գործընկերության հանձնաժողովի հաջորդ նիստը կկայանա աշնանը»,- հավելել է նա։ Քարիմը նաեւ ասել է, թե «իրոք տպավորվել է» այն առաջընթացով, որին հեղափոխությունից հետո վերջին մի քանի ամիսների ընթացքում հասել է Հայաստանը։ Նրա խոսքերով, անցյալ ընտրությունները եղել են ոչ միայն ժողովրդավարական նշաձող, այլեւ փորձություն՝ նոր կառավարության համար եւ Հայաստանի ու Եվրամիության միջեւ երկկողմ հարաբերությունների հետագա խորացման համար։