Հայաստանում երիտասարդ ժողովրդավարության համար հաջորդ մարտահրավերը տնտեսական հզորության ամրապնդումն է: Այս մասին հայտարարել է Հայաստանի վարչապետ Նիկոլ Փաշինյանը՝ ելույթ ունենալով Դավոսում ընթացող Համաշխարհային տնտեսական համաժողովում:
«Մենք ժողովրդավարության մեջ վիթխարի հաջողություն ունենք, բայց կան նաեւ մեծ մարտահրավերներ, իսկ հատկապես՝ մեր ժողովրդավարությունը տնտեսապես ավելի հզոր դարձնելը: Մենք պատրաստվում ենք մեր տնտեսական կառուցվածքում նոր հատված ստեղծել: Մենք պատրաստվում ենք նոր կարգ ստեղծել՝ միկրոբիզնես, որը հարկերից կազատվի՝ այն հույսով, որ կոգեշնչենք մեր քաղաքացիներին»,- հայտարարել է Փաշինյանը՝ «Ժողովրդավարության ապագայի ձեւավորումը» բանավեճի ժամանակ ելույթ ունենալիս:
Փաշինյանը նշել է, թե նպատակն է բացատրել, որ ոչ միայն կառավարությունն է պատասխանատու աղքատության հաղթահարման համար, այլ մարդիկ էլ պետք է գործեն:
Հայաստանի վարչապետը շեշտել է, որ կառավարության գլխավոր խնդիրն է «ժողովրդավարության տնտեսապես ամրապնդումը» եւ նոր արտասահմանյան ներդրումների ներգրավումը: