Օրենսդրությամբ փոխվել է մի շատ կարեւոր բան. փոխվել են ԵՏՄ կանոնները, ըստ որի չմաքսազերծվող բեռի չափաքանակը 50 կգ-ից դարձել է 25 կգ: Այս մասին, այսօր՝ հունվարի 24-ին, կառավարության նիստից հետո լրագրողների հետ զրույցում նշեց ՊԵԿ նախագահ Դավիթ Անանյանը
Նրա խոսքով, երբ նախորդ տարի 50 կգ չափաքանակի նորմը ներմուծեցին, տարվա վերջին տեսան, որ մարդիկ իրենց անձնական օգտագործման մեքենաներով ներկրման հնարավորությունը դիտարկել են որպես բիզնես իրականացնելու շատ կարճ ճանապարհ:
«Հիմա, երբ 50 կգ-ն իջեցվեց 25 կգ-ի, մենք հարցը քննարկել ենք նաեւ վարչապետի հետ եւ ռիսկի պրոֆիլներ պետք է ներմուծենք եւ հաճախականություն սահմանելով, փորձենք կանոնակարգել նաեւ 25 կգ-ներով ներմուծումները»,-ասաց Դավիթ Անանյանը:
Անդրադառնալով Բագրատաշենի անցակետում ստեղծված իրավիճակին, երբ մարդկանց բեռը Թուրքիայից եկել է Վրաստան, իսկ էնտեղից չեն կարողանում բերել Հայաստան, ՊԵԿ նախագահն ասաց. «Եթե ես փոստով պատվիրում եմ ինչ-որ մի դեղ, ինչո՞ւ եմ պատվիրում, որ դա գա Վրաստան, էնտեղից ինչ-որ մեկը բերի»:
Դիտարկմանը, որ միանգամից Հայաստան բերելու դեպքում ավելի թանկ է, քանի որ կգ-ն մոտ 4 դոլար է, Անանյանն արձագանքեց. «Պետք է քննարկել, որ եթե միանգամից Հայաստան գային, մաքսային ձեւակերպում պետք է ունենային, թե չունենային:
Պարոն Վանեցյանի հետ հեռախոսազրույցի ժամանակ միասնական որոշում կայացրեցինք, որ եթե նույնիսկ համարենք, որ մարդիկ չեն իմացել, միգուցե հայտարարենք, որ սա վերջինն է, այնուհետեւ չոր վարչարարություն ենք իրականացնելու»: