Հայաստանում տեխնոլոգիական ոլորտն արագորեն աճում է, եւ այդ աճի տեմպն աննախադեպ է: Այս մասին, այսօր՝ փետրվարի 1-ին, գերմանական Կոնրադ Ադենաուեր հիմնադրամում իր ելույթում նշեց է ՀՀ վարչապետ Նիկոլ Փաշինյանը:
Նա, մասնավորապես, նշել է. «Վերջին յոթ տարիների ընթացքում այդ ոլորտն հինգ անգամ աճել է: ՏՏ ոլորտը դառնում է մեր տնտեսական աճի շարժիչ ուժերից մեկը` հետագա զարգացման համար հսկայական ներուժով:
ԽՍՀՄ-ից ժառանգած մաթեմատիկայի, ֆիզիկայի եւ տեխնիկական գիտությունների ավանդական ուժեղ դպրոցն այս ոլորտում Հայաստանի հաջողություն հիմնական գրավականն է: Այնուամենայնիվ, համոզված եմ, որ հայկական հեղափոխությունը, որը նպաստավոր պայմաններ է ստեղծել մեր ժողովրդի տաղանդի անսահմանափակ դրսեւորման համար, զգալիորեն կնպաստի մեր երկրի տեխնոլոգիական զարգացմանը:
Կարծում եմ, որ ազատությունը, ստեղծագործական եւ նորարարության ոգին փոխկապակցված են: Հայաստանի նոր կառավարությունը տեխնոլոգիական ոլորտը գերակա է համարում, քանզի մենք դրանում տեսնում ենք մեր տնտեսական հեղափոխության լոկոմոտիվը եւ ապագա Հայաստանի տնտեսության անկյունաքարը:
Տիկնայք եւ պարոնայք,
Ուզում եմ խոսքս ավարտել՝ վերահաստատելով, որ ԵՄ-ի եւ նրա անդամ-պետությունների հետ համագործակցությունը կարեւոր նշանակություն ունի ժողովրդավարական Հայաստանի համար:
Միեւնույն ժամանակ կարծում եմ, որ իր հերթին, Եվրոպան շահագրգռված է Հարավային Կովկասի անկայուն տարածաշրջանում ունենալ կայուն, ժողովրդավարական գործընկեր` ի դեմս տնտեսապես զարգացող եւ առաջադեմ Հայաստանի, որի հետ ունի ընդհանուր եվրոպական արժեքներ»:
Ելույթից հետո, տեղի է ունեցել հարցուպատասխան, որի ժամանակ ՀՀ վարչապետը ներկայացրել է ՀՀ-ում տեղի ունեցող ժողովրդավարական զարգացումները, տարբեր ոլորտներում իրականացվող բարեփոխումները, կոռուպցիայի դեմ պայքարի շրջանակում տարվող աշխատանքները, տնտեսական հեղափոխության ուղղությամբ իրականացվող քայլերը, Լեռնային Ղարաբաղի հակամարտության կարգավորման գործընթացին վերաբերող հարցերը եւ այլն: