ԵՄ-ի ղեկավարությունը, միության որոշ երկրների տարածքների վրա Իրանի «թշնամական» գործողությունների հետ կապված, երկու ֆիզիկական անձանց եւ մեկ կազմակերպության պատժամիջոցների ցուցակում ներառելու որոշում է կայացրել՝ ասվում է ԵՄ-ի հայտարարության մեջ՝ հայտնում է «Ինտերֆաքսը»։

Հայտարարության մեջ չի հստակեցվում, թե հատկապես որ ֆիզիկական եւ իրավաբանական անձանց մասին է խոսքը։ «Եվրոպական միությունը կշարունակի այդ ոլորտում ցուցաբերել միասնականություն ու համերաշխություն եւ Իրանին կոչ է անում անհապաղ վերջ դնել այդ անընդունելի գործունեությանը»,- նշվում է փաստաթղթում։

Հայտարարության մեջ նաեւ ասվում է, որ ԵՄ ղեկավարությունը տարածաշրջանում Իրանի գործողությունները, այդ թվում նրա ներկայությունը Սիրիայում, տագնապալի է համարում։

Բացի այդ, Բրյուսելում Իրանին եւ տարածաշրջանային ուժերին կոչ են արել նպաստել Եմենում հակամարտության քաղաքական լուծմանը։

ԵՄ խորհուրդը Իրանի հետ եմենյան խնդրի հարցով երկխոսությունը շարունակելու պատրաստակամություն է հայտնել եւ ողջունել է անցյալ տարվա վերջին Շվեդիայում Եմենի շուրջ խաղաղ բանակցություններին Իրանի աջակցությունը։

Հայտարարության մեջ նաեւ ասվում է, որ Եվրամիությունը, որպես Համատեղ համընդգրկուն գործողությունների պլանի իրականացման կարեւոր մաս, դիտարկում է Իրանի դեմ սահմանափակումների վերացումը։ «Եվրամիությունը կարծում է, որ Իրանի դեմ պատժամիջոցների հանումը ՀՀԳՊ-ի կարեւոր մասն է, եւ ափսոսանք է հայտնում, որ ԱՄՆ-ը կրկին սահմանափակումներ է մտցրել համաձայնագրից դուրս գալուց հետո»,- նշվում է փաստաթղթում։