ԱՄՆ պետքարտուղար Մայք Պոմպեոն Fox Business հեռուստաալիքին տված հարցազրույցում ասել է, թե հնարավոր է համարում, որ «Իսլամական պետություն» ահաբեկչական կազմակերպության զինյալները Սիրիայից Աֆրիկա կտեղափոխվեն։
«Այո, նրանք կփորձեն անել դա։ Նրանք արդեն վաղուց են փորձում։ Նրանք փորձում են տեղափոխվել եւ հիմնվել այնտեղ՝ լինի Աֆրիկայում, թե Լիբիայի հյուսիսում»,- ՌԻԱ «Նովոստի»-ն մեջբերում է Պոմպեոյի պատասխանը հարցին, թե զինյալները Սիրիայից այլ երկրներ կտեղափոխվեն արդյոք։ Նա ավելացրել է, որ ԱՄՆ խնդիրն է «թույլ չտալ տարածք ստանալ, շարունակել ճնշել նրանց, նվազեցնել նրանց ֆինանսական հնարավորությունները»։
