Եկեք սպասենք և շատ ուշադիր լինենք յուրաքանչյուր միջոցառմանը, որ կհրապարակվի Կառավարության կողմից, քանի որ դրանք են ուղենշելու Կառավարության ծրագրում առկա կետերի իրականացումը։ Այսօր՝ փետրվարի 8-ին, լրագրողների հետ զրույցում նշեց Տնտեսական զարգացման և ներդրումների նախարար Տիգրան Խաչատրյանը՝ արձագանքելով Կառավարության ծրագիրը՝ որպես «Կենացների ժողովածու» բնորոշելուն։
«Մենք շատ ենք կենտրոնանում կառավարության ծրագրի վրա, որտեղ ուզում ենք տեսնել բոլոր հարցերի պատասխանները՝ մոռանում ենք, որ (բոլոր ժամանակներում այդպես է եղել) Կառավարության ծրագրին հաջորդում են կառավարության կողմից հայտարարվող այն միջոցառումները, որ արդեն կարճաժամկետ բնույթ ունենալով՝ կա՛մ պիտի հաստատեն, որ կառավարությունը գնում է, իր հայտարարած նպատակների և խնդիրների լուծմանը, կա՛մ պետք է քննադատվեն՝ ասելով, որ այս միջոցառումները դրանք չեն, որ պիտի ապահովեին այդ նպատակներին հասնելը»,– ասաց նա։