Ազգային ժողովի Արտաքին հարաբերությունների մշտական հանձնաժողովն այսօր գումարեց իր առաջին նիստը, որտեղ հանձնաժողովի փոխնախագահ ընտրվեց «Իմ քայլը» խմբակցության պատգամավոր Հովհաննես Իգիթյանը:
Վերջինս իր խոսքում նշեց, որ կարեւորում է խորհրդարանական դիվանագիտությունը, քանի որ այն լուրջ ինստիտուտ է համարում։
«Արտաքին քաղաքականությունը կոլեկտիվ աշխատանք է ենթադրում, եւ անկախ քաղաքական պատկանելիությունից, տարբեր խմբակցության անդամ լինելուց` դրսում պետք է գտնել այն մոտեցումը, որն ընդհանուր է բոլորի համար: Առաջին հերթին կարեւոր է խորհրդարանական դիվանագիտությունը, որը լուրջ ինստիտուտ է, ավելի լայն, քան պետության արտաքին դոկտրինը: Ես այստեղ տեսնում եմ ուժեղ թիմ: Օրինակ` ԵԽԽՎ-ում մենք կարողացել ենք գտնել այնպիսի մոտեցում, որը արտաքին քաղաքականության մեջ մեզ ներկայացրել է որպես մեկ թիմ` մեկ մոտեցումով»,- ասաց Իգիթյանը՝ հավելելով. « Խորհրդարանական դիվանագիտությունը սկսում է մեկ պատգամավորից: Ինձ թվում է, որ ամեն երկրի հետ պետք է ունենանք մի մոտեցում, կոնցեպտ: Յուրքանչյուր երկրի հետ դա այլ է»:
Վերջինիս գնահատմամբ՝ յուրաքանչյուր պետության հետ յուրովի պետք է բանակցել ու հարաբերություն հաստատել։ Հովհաննես Իգիթյանի խոսքով՝ անհրաժեշտ է բարեկամական խմբեր ստեղծել՝ խորացնելով խորհրդարանական համագործակցությունն այլ երկրների հետ։
Ի վերջո հանձնաժողովը միաձայն կողմ քվեարկեց Հովհաննես Իգիթյանի թեկնածությանը: Պատգամավորները հաստատեցին նաեւ հանձնաժողովի աշխատակարգը:
